پێنج لایەنی کوردستان ئەمڕۆ دوایین بڕیار لەبارەی پێکهێنانی هاوپەیمانێتی دەدەن

ئاڤا نیوز

پێنج لایەنی دەرەوەی یەکێتی و پارتی لە سلێمانی کۆدەبنەوە و بڕیاری کۆتایی لەبارەی پێکهێنانی هاوپەیمانێتی یان بەشداریکردن بە جیا دەدەن، بەمەبەستی بەشداریکردن لە هەڵبژاردنی خولی شەشەمی پەرلەمانی عێراق.

 

وێنە گەورەکە: ماوەی چەند ڕۆژێکە لایەنەکانی دەرەوەی یەکێتی و پارتی، کە پێکهاتوون لە نەوەی نوێ، کۆمەڵی دادگەری، یەکگرتووی ئیسلامی، بەرەی گەل و بزووتنەوەی پەیوەندیی ئیسلامی، بە ئامانجی پێکهێنانی بەرەیەکی هاوبەش و هاوپەیمانیتییەک بۆ هەڵبژاردنی ئەنجوومەنی نوێنەرانی عێراق چەند کۆبوونەوەیەکیان لە شاری سلێمانی کردووە و خاڵی ناکۆک وایکردووە تاوەکو ئێستا هاوپەیمانێتییەک ڕانەگەیێنن.

 

لێدوانی فەرمی: بێستوون حەمە ساڵح، بەرپرسی مەکتەبی هەڵبژاردنی کۆمەڵی دادگەری بە ئاڤای گوت، "ئەمڕۆ دوایین کۆبوونەوە لە نێوان ئەو لایەنانە دەکرێت کە ماونەتەوە بۆ پێکهێنانی هاوپەیمانێتییەکی هاوبەش، بڕیار دەدرێت بۆ بەشداریکردن بەیەک هاوپەیمانێتی یاخود نا."

 

زانیاریی زیاتر: بەرپرسی مەکتەبی هەڵبژاردنی کۆمەڵی دادگەری، هۆکاری نەگەیشتن بەڕێککەوتن سەرەڕای زنجیرەیەک کۆبوونەوە بۆ ئەوە گەڕاندەوە، کە ڕەوتی هەڵوێست ئامادەنین لەگەڵ نەوەی نوێ لەیەک هاوپەیمانێتی دابێت، نەوەی نوێش هەندێ مەرجی قوورسی هەن بۆ بەشداریکردن، ئەمڕۆ هەموو شتێک یەکلایی دەبێتەوە."

 

ئەمەش بزانە: جیا لە بزووتنەوەی پەیوەندیی ئیسلامی کوردستان کە هیچ کورسییەکی لە هەڵبژاردنی پەرلەمانی کوردستان بەدەست نەهێنا، چوار حیزبەکەی دیکە لە دوایین هەڵبژاردنی پەرلەمانی کوردستان کە لە کۆتاییەکانی ساڵی ڕابردوو بەڕێوەچوو، 27 کورسییان هەیە.