ڕاوێژکارێکی سوودانی: بەستنی لووتکەی عەرەبی نیشانەی ئارامی و سەقامگیریی عێراقە

ئاڤا نیوز

34ـەمین لووتکەی کۆمکاری عەرەبی لە بەغدا بەڕێوەدەچێت، ڕاوێژکارێکی سوودانی، لووتکەکە بە "دەستکەوتی گەورە" ناو دەبات و ئاماژەش بەوە دەکات؛ ئەوە نیشانەی دەستکەوتێکی گەورەیە.

وێنە گەورەکە: لووتکەی وڵاتانی عەرەبی ڕۆژی شەممە 2025-05-17، لە بەغدا بەڕێوەدەچێت و بۆ ئەم کۆبوونەوەیە پادشا و سەرۆکی هەر 22 وڵاتەکەی ئەندام لە کۆمکاری عەرەبی بانگهێشتکراون، هاوکات چەندین سەرکردەی جیهانی میوانی لووتکەکەن.

لێدوانی فەرمی: فەرهاد عەلائەددین، ڕاوێژکاری سەرۆکوەزیرانی عێراق بە ئاڤا میدیای ڕاگەیاند: بەستنی لووتکەیەکی وا گەورە خۆی لەخۆیدا سەرکەوتنە و دەستکەوتێکی گەورەیە، نیشانەی ئەوەیە کە بەغدا ئێستا ئارام و سەقامگیرە، نوێنەری 22 وڵاتی عەرەبی بەشدار دەبن و لەپاڵ ئەوانەشدا ئەنتۆنی گۆتێرێش، ئەمینداری گشتیی نەتەوە یەکگرتووەکان و پیدرۆ سانشێز، سەرۆکوەزیرانی ئیسپانیا میوانی لووتکەکە دەبن، هاوکات 300 ڕۆژنامەنووس بەشدارن. ئەمە دەستکەوتێکی گەورەیە بۆ عێراق و پەیامێکی کاریگەرە بۆ ناوخۆ و دەرەوە و کۆمەڵگەی نێودەوڵەتیش.

ئەوەی پێویستە بیزانیت: ڕۆژی پێنجشەممە، بە سەرپەرشتیی د.فوئاد حوسێن، جێگری سەرۆکوەزیران و وەزیری دەرەوەی عێراق کۆبوونەوەی ئامادەکاری وەزیرانی دەرەوەی عەرەبی بۆ سی و چوارەمین لووتکەی عەرەبی بەڕێوەچوو، عێراق چەند دەستپێشخەرییەکی کرد و لە کۆبوونەوەکە پەسەند کرا.