ئیسرائیل دەستپێکردنی ئۆپەراسیۆنێکی فراوان لە غەززە ڕادەگەیێنێت

ئاڤا نیوز

 

سوپای ئیسرائیل بەرەبەیانیی ئەمڕۆ شەممە ڕایگەیاند، ئۆپەراسیۆنێکی گەورە  و فراوانی نوێی سەربازی لە کەرتی غەززە دەستپێکردووە.

 

وێنە گەورەکە: هەفتەیەک لەمەوبەر ئیسرائیل ئامادەکاری بۆ فراوانکردنی هێرشەکانی بۆ سەر کەرتی غەززە کرد، ئەمڕۆ شەممە، ڕێککەوتی 17-5-2025، بە فەرمی دەستپێکردنی ئۆپەراسیۆنەکەی ڕاگەیاند.

 

ڕاگەیێنراوی فەرمی: سوپای ئیسرائیل ڕایگەیاند: لە ڕۆژی هەینییەوە سوپا دەستیکردووە بە هێرشێکی بەرفراوان و هەمەلایەنە و کۆکردنەوەی هێزەکان لە چەند ناوچەیەکی غەززە، بۆ گەیشتن بە چەند ئامانجێک لەوانە: ئازادکردنی بارمتەکان و لەناوبردنی تەواوەتی بزووتنەوەی حەماس.

 

لەلایەکی دیکەوە: سەرچاوە پزیشکییەکان ڕایگەیاند: بەهۆی هێرشە ئاسمانییەکانی  ئیسرائیل لە ماوەی 24 کاتژمێردا 100 کەس لە باکووری غەززە کوژراون و 200 کەسی دیکەش برینداربوون.

 

قووڵتر: پێشتر سوپای ئیسرائیل ڕایگەیاندبوو، فراوانکردنی ئۆپەراسیۆنە سەربازییەکان دوای سەردانەکەی دۆناڵد ترەمپ، سەرۆکی ئەمریکا بۆ ناوچەکە ئەنجام دەدەن، ئەگەر هاتوو هیچ ڕێککەوتنێكی نوێ سەبارەت بە غەززە نەکرێت، بەڵام ترەمپ گەشتەکەی بۆ کەنداو کۆتایی پێهێنا و هیچ ڕێککەوتنێکیش سەبارەت بە غەززە نەکرا.