وەزارەتی ناوخۆی عێراق لێکۆڵینەوە لە دەرکردنی پاسپۆرت بۆ "تیرۆرستێک" دەکات

ئاڤا نیوز

 

ئەندامێکی پەرلەمانی عێراق دەڵێت، دوای ئەوەی بەڵگەنامەی ئاڕاستەی حکومەت کرد کە  "تیرۆرستێک" پاسپۆرت و کارتی نیشتیمانی بۆ دەرکراوە، وەزارەتی ناوخۆ لیژنەیەکی لێکۆڵینەوەی لەسەر دۆسییەکە پێکهێناوە.

 

وێنە گەورەکە: بەپێی قسەکانی ئەو پەرلەمانتارە، ئەو کەسە لە ساڵی 2008 بەتۆمەتی تیرۆر فەرمانی دەستگیرکردنی هەیە و دەستگیرنەکراوە، بەم دواییانەش لە یەکێک لە پارێزگاکانی عێراق کارتی نیشتیمانی بۆ دەرکراوە، پێشتریش پاسپۆرت و مۆڵەتی شۆفێری بۆ دەرکراوە.

 

لێدوانی فەرمی: حەیدەر سەلامی، ئەندامی پەرلەمانی عێراق ڕایگەیاند، دوای بڵاوکردنەوەی بەڵگەنامەکانی تایبەت بەو کەسە، وەزارەتی ناوخۆ هاتووەتەسەر خەت و لیژنەیەکی بۆ بەدواداچوون لەسەر دۆسییەکە پێکهێناوە.

 

- ئەو پەرلەمانتارە باوەڕی وایە تێپەڕبوونی ئەو بابەتە بەسەر سێ دەزگای دەوڵەتیدا جێگەی سەرسوڕمانە، بۆیەش داوایکرد لێپرسینەوە لەو کەسانە بکرێت کە ئاسانکارییان بۆ ئەو داواکراوە کردووە و بەڵگەنامەی دەوڵەتییان بۆ دەرکردووە.