ترەمپ: لێکۆڵینەوە لەگەڵ هاریس دەکەین

ئاڤا نیوز

سەرۆکی ئەمریکا ڕایگەیاند، بەهۆی ئەوەی لە بانگەشەی هەڵبژاردنەکان، کامالا هاریس پارەی بە کەسە بەناوبانگەکان داوە، لێکۆڵینەوەی لەگەڵ دەکەین.

چیرۆکی سەرەکی: بەهۆی ئەوەی کامالا هاریس، ڕکابەری پێشووی دۆناڵد ترەمپ، سەرۆکی ئەمریکا، لە هەڵبژاردنەکانی ساڵی ڕابردوو پارەیەکی خەیاڵی بۆ کەسایەتییە ناودارەکان خەرجکردووە بۆ ئەوەی پشتگیری بکەن لە هەڵبژاردنەکانی سەرۆکایەتیی ئەمریکا، ترەمپ داوای لێکۆڵینەوە لە هاریس دەکات.

لێدوانی فەرمی: دۆناڵد ترەمپ، سەرۆکی ئەمریکا لە سۆشیال تروس ڕایگەیاند: ''کامالا هاریس چەند پارەی بە کەسایەتییە دیارەکان داوە بۆ ئەوەی پشتگیری بکەن سەرەڕای ئەو ئاستە خراپەی لە کەمپەینەکانی هەڵبژاردن پێشکەشی کرد، بەڵام دەبێت لێکۆلینەوەی لەگەڵ بکرێت بەهۆی بە هەدەردارنی ئەو هەموو پارەیە''.

زانیاریی زیاتر: لەکاتی بەڕێوەچوونی هەڵمەتی هەڵبژاردنەکانی سەرۆکایەتیی ئەمریکا لە ساڵی ڕابردوودا چەندین کەسایەتیی دیار پشتگیری خۆیان بۆ کامالا هاریس دەڕبری و تۆمەتبار کرا بەوەی پارەیەکی خەیاڵی بۆ ئەو هونەرمەندانە خەرجکردووە و دۆناڵد ترەمپ ئەم خەرجکردنەی بە گەندەڵی و نایاسایی وەسف کرد .