هاووڵاتییەک بەتۆمەتی ئاگرکەوتنەوەکەی سەیدسادق دەستگیر دەکرێت

ئاڤا نیوز

دوای نیوەڕۆی ئەمڕۆ لە سنووری قەزای سەیدسادق ئاگر لە دەیان دۆنم زەوی کەوتەوە، بەڕێوەبەرایەتیی پۆلیسی دارستان و ژینگەی سلێمانییش لەوبارەیەوە دەڵێت 'کەسێک بە تۆمەتی کردنەوەی ئاگرەکە دەستگیر کراوە'.

چیرۆکی سەرەکی: ئەمڕۆ دووشەممە 19-5-2025، ئاگر لە 60 دۆنم زەوی لە سنووری قەزای سەیدسادق کەوتەوە، بەوهۆیەشەوە پڕۆژەیەکی هەنگەوانی سوتا.

بڵاوکراوەی فەرمی: بەڕێوەبەرایەتیی پۆلیسی دارستان و ژینگەی سلێمانی ڕایگەیاند: دوای ئەوەی لە ئاگرکەوتنەوەکەی گوندی وڵەسمت ئاگادارکراینەوە، تیمێکی بەشی پۆلیسی دارستان و ژینگەی سەیدسادق گەیشتنە شوێنی ڕووداوەکە، بەهاوکاری دانیشتوانی گوندەکە توانرا ئاگرەکە کۆنترۆڵ بکرێت.

زانیاریی زیاتر: بەگوێرەی دەرئەنجامی سەرەتایی نزیکەی 60 دۆنم زەوی جووتیاران و پڕۆژەیەکی هەنگەوانی بەهۆی ئاگرەکەوە سووتاون.

لەلایەکی دیکەوە: لێکۆڵینەوە و بەدواداچوون لەلایەن پۆلیسی دارستانەوە کرا و توانرا هاووڵاتییەک بە تۆمەتی کەوتنەوەی ئاگرەکە دەستگیر بکەن.

ئەوەی پێویستە بیزانیت: پەڕاوی لێکۆڵینەوە بۆ وەرگرتنی ڕێکاری یاسایی ڕێکخراوە، بۆ ئەوەی لەلایەن دادوەری لێکۆڵینەوە ڕێکاری یاسای بگیرێتەبەر.