نەتانیاهۆ: دەست بەسەر تەواوی غەززەدا دەگرین

ئاڤا نیوز

 

ڕۆژی دووشەممە سەرۆکوەزیرانی ئیسرائیل رایگەیاند، ئامانجمان ئەوەیە دەستبەسەر تەواوی کەرتی غەززەدا بگرین.

 

وێنە گەورەکە: ئیسرائیل پلانەکەی بۆ داگیرکردنی تەواوی کەرتی غەززە دووپاتدەکاتەوە و دەڵێت، ئامانج لێی ئازادکردنی تەواوی بارمتەکان و لەناوبردنی ژێرخانی سەربازی بزووتنەوەی حەماسە.

 

لێدوانی فەرمی: بنیامین نەتانیاهۆ، سەرۆکوەزیرانی ئیسرائیل ڕایگەیاند: هێرشی چر و بەرفراوان لە کەرتی غەززە ئەنجام دەدەین, سوپای کاری گەورە لەو کەرتە دەکات و ئامانجمان داگیرکردنی تەواوی کەرتی غەززەیە، بەڵام وردەکارییەکان ئاشکرا ناکەین.

 

ئەمەش بزانە: نەتانیاهۆ گوتیشی، هاوکارییە مرۆییەکان لەلایەن حەماسەوە دەستبەسەر داگیراون بۆیە ڕامان گرتوون، بەڵام ئەمڕۆ ڕێگە بە چەند بارهەڵگرێکی هاوکاریی دەدەینە کە بچنە ناو کەرتی غەززە.

 

لەلایەکی دیکەوە: سوپای ئیسرائیل ڕایگەیاند، لە ماوەی چەند کاتژمێری ڕابردوودا، 160 هێرشی ئاسمانیمان کردووەتەوە سەر تەواوی کەرتی غەززە، ئەمەش دوای بڕیاری بەرفراوانکردنی هێرشەکانە بۆ سەر ئەو کەرتە.

 

زانیاریی بەدەستهاتوو: دوای بڕیاری ئیسرائیل بۆ بەرفروانکردنی هێرشەکانی لە کەرتی غەززە، نزیکەی 500 کەس لە سێ ڕۆژدا کوژران کە زۆربەیان هاووڵاتیی سڤیلن ئەمەش کاردانەوەی وڵاتانی بەدوای خۆیدا هێنا.