فایلی خەڵک؛ خەڵکی گەڕەکی تەعجیلی نوێ بەدەست کەمیی خزمەتگوزارییەوە دەناڵێنن

ئاڤا نیوز

دانیشتوانی گەڕەکی تەعجیلی نوێ لەهەولێر خزمەتگوزارییان نییە و قایمقامی قەزای بنەسڵاوەش دەڵێت بەهۆی نەبوونی بودجە نەتوانراوە کێشەکانیان چارەسەر بکرێت.

چیرۆکی سەرەکی: دانیشتوانی گەڕەکی تەعجیلی نوێ لە قەزای بنەسڵاوە بەدەست نەبوونی خزمەتگوزاری وەک بێ ئاوی، تەواونەکردنی قوتابخانەی گەڕەکەکە و قیرتاو نەکردنی شەقام، دەناڵێنن.

لێدوانی فەرمی: دانیشتووێکی گەڕەکەکە بەناوی عوسمان محەممەد بە ئاڤای وت، هەفتەیەکە لەبەر بێ ئاوی خۆم نەشوشتووە، فەردەیەک جل و بەرگی پیسمان هەیە ئاو نیە بیانشۆین. میراوەکەش بەئەنقەست ئاومان بۆ بەرناداتەوە، هەر ماڵێکی بەدڵ نەبێت ئاوی پێ نادات.

بۆچوونی لایەنی بەرامبەر: جوان رەفیق، قایمقامی قەزای بنەسڵاوە بە ئاڤای وت: بەهۆی نەبوونی بودجە نەتواندراوە شەقامەکە قیرتاو بکرێت و قوتابخانەکەش تەواو بکرێت. سەبارەت بە ئاوەکەش ئێمە خۆمان چاودێر دەبین بەسەر ئەو کەسەی ئاو بۆ گەڕەکەکە بەردەداتەوە ناهێڵین بە میزاجی خۆی کار بکات.

جگە لەوەش تا کۆتایی ئەمساڵ پڕۆژەی فریاگوزاری خێرای گەیاندنی ئاو دەگات بە گەڕەکی تەعجیلی نوێ و هەموو هەولێر هەربۆیە بەیەکجاری دانیشتوانی گەڕەکەکە ڕزگاریان دەبێت لە بێ ئاوی.