د.ئامانج ڕەحیم: گرێبەستەکانی کوردستان لە واشنتن نابێت گرفت بۆ مووچە دروست بکات

ئاڤا نیوز

سکرتێری ئەنجوومەنی وەزیران ڕەتیدەکاتەوە کە گرێبەستەکانی ئەم دواییەی حکومەتی هەرێمی کوردستان لە واشنتن بۆ پەرەپێدانی کەرتی وزە کاریگەری هەبێت لەسەر دروستبوونی گرفت بۆ مووچەی مووچەخۆران. 

وێنە گەورەکە: بە ئامادەبوونی مەسرور بارزانی، سەرۆکوەزیرانی کوردستان لە واشنتن، وەزارەتی سامانە سروشتییەکانی هەرێمی کوردستان دوو گرێبەستی بۆ پەرەپێدانی دوو کێڵگەی گاز سروشتی واژۆ کرد. گرێبەستەکان بەمجۆرەن: گرێبەستێک بۆ پەرەپێدانی کێڵگەی تۆپخانە -کوردەمیر لە گەرمیان لەگەڵ کۆمپانیای وێسترن زاگرۆس واژۆ کرا، کێڵگەکە پێنج ترلیۆن پێ سێجا گازی سروشتی و 900 ملیۆن بەرمیل نەوتی تێدایە بەهای پڕۆژەکە 70 ملیار دۆلارە. گرێبەستی دووەم لەگەڵ کۆمپانیای ئێچ کەی ئێن ئینێرجی بۆ کێڵگەی گازی میران لە بازیان، ئەم کێڵگەیە هەشت ترلیۆن پێ سێجا گازی سروشتی تێدایە بەهای پڕۆژەکە 40 ملیار دۆلارە.

 

ئەوەی لەبارەیەوە دەگوترێت: دوای واژۆکردنی ئەو دوو گرێبەستە، نیگەرانی و دڵەڕاوکێ لای بەشێک لە خەڵکی دروستبووە و باس لەوە دەکەن کە ڕەنگە کاریگەری لەسەر دواکەوتنی مووچە هەبێت لە بەغداوە.

 

لێدوانی فەرمی: د.ئامانج ڕەحیم، سکرتێری ئەنجوومەنی وەزیرانی هەرێمی کوردستان، بە ئاڤای ڕاگەیاند، لەسەر بابەتی بودجە و مووچەی مووچەخۆرانی هەرێمی کوردستان، جەختمان لەسەر ئەوە کردووەتەوە کە ئەم بابەتە پێویستە دوور بێت لە هەموو ناکۆکییەکی نێوان هەولێر و بەغدا.