ڕێكخەری گشتیی بزووتنەوەی گۆڕان هەڵدەبژێردرێت

ئاڤا نیوز  

گوتەبێژی كۆنفڕانسی تەواوكاریی بزووتنەوەی گۆڕان ئاشكرای دەكات، ئەمڕۆ لە چوارچێوەی كۆنفڕانسەكە ڕێكخەری گشتیی بزووتنەوەكە هەڵدەبژێردرێت.

 

وێنە گەورەكە: ئەمڕۆ شەممە 24-5-2025، كۆنفڕانسی نیشتمانیی هاوبەشی دوو ئاراستە و بەرە جیاوازەكەی گۆڕان لە شاری سلێمانی بەڕێوە دەچێت، تەنیا 1200 كەس بۆیان هەیە بەشداریی لە كۆنفرانسەكە بكەن و ئەمڕۆ دوا وادەیە بۆ یەكلاكردنەوەی پرسەكە.

 

لێدوانی فەرمی: شاخەوان ڕەئوف بەگ، گوتەبێژی کۆنفڕانسی تەواوکاریی بزووتنەوەی گۆڕان لە كۆنفڕانسێكی ڕۆژنامەوانیدا ڕایگەیاند:

 

- ئەندامانی دەستەی گشتی كە ناویان لە لیستی ساڵی 2017 هەیە، هەروەها ئەندامانی دەستەی دامەزرێنەرانی بزووتنەوەی گۆڕان مافی بەشداریكردنیان لە كۆنفڕانسی نیشتمانیی بزووتنەوەی گۆڕان هەیە.

 

- كۆنفڕانسەكە تەواوكارییە و دەمانەوێت ئەمڕۆ دەستوور و پەیڕەوی ناوخۆ پەسەند بكەین و دەمانەوێت لەنێو كۆنفڕانس ئەندامانی كۆنفڕانس و هەڵسوڕاوانی گۆڕان دیار بكەین و ڕێكخەری گشتیی بزووتنەوەی گۆڕانیش هەڵبژێرین هاوكات هەر لە كۆنفڕانسەكەدا جڤاتی نیشتمانیش هەڵدەبژێرین.

 

ئەوەی پێویستە بیزانیت: باڵی گردی زەرگەتە، مستەفا وەفایی و باڵی گەڕەكی كوردساتیش دانا ئەحمەد مەجیدی بۆ ڕێكخەری گشتیی بزووتنەوەی گۆڕان دەستنیشان كردووە، بەڵام باس لەوە دەكرێت كە مستەفا وەفایی ئەگەری زیاتری سەركەوتن و بەدەستهێنانی پۆستەكەی هەیە.