یاسای باڵاپۆشی لە ئێران ڕادەگیرێت

ئاڤا نیوز

لە ئێران جێبەجێكردنی یاسای باڵاپۆشی هەڵدەپەسێردرێت، بۆ ئەم مەبەستەش ئەنجوومەنی ئاسایشی نەتەوەیی ئێران بەنووسراو داوای لە سەرۆكایەتی پەرلەمان كردووە، یاساكە ڕانەگەیێنێت.

زانیاریی بەدەستهاتوو: بەپێی میدیاكانی ئێران لەزاری محەممەد باقر قالیباف، سەرۆكی پەرلەمانی ئەو وڵاتە؛ سكرتاریەتی ئەنجوومەنی ئاسایشی نەتەوەیی ئێران، بەنووسراوی فەرمی پەرلەمانی لەوە ئاگادار كردووەتەوە، كە پێویستە جێبەجێكردنی یاسای باڵاپۆشی ڕانەگەیێنرێت.

ئەوەی پێویستە بیزانیت: یاسای پاراستنی کولتووری داوێنپاکی و باڵاپۆشی، چەند ساڵێكە لە پەرلەمانی ئێران تێپەڕێندراوە، كە بەپێی یاساكە كۆتوبەند و سزا و ڕێكاری تووند بەرامبەر هەر ئافرەتێك دەگرێتەبەر كە سەرپێچی باڵاپۆشی دەكات، مانگێك لەمەوبەر؛ سەرۆكایەتی پەرلەمانی ئێران لەسەر داوای پەرلەمانتار محەممەد تەقی نەقدعەلی، نوێنەری پارێزگای خومەینی شەهر، دەنگدانی لەسەر جێبەجێكردنی یاسای باڵاپۆشی خستبووە بەرنامەی كاری پەرلەمانەوە.

هۆكارە زانراوەكان: تووندڕەوەکانی ئێران فشارێكی زۆر لە حكومەت و پەرلەمان دەكەن بۆ ئەوەی یاساکە بخرێتە بواری جێبەجێکردن، بەڵام دوای هاتنی مەسعود پزیشکیان، سەرۆككۆماری ئێران، جێبەجێكردنی یاساكە زیاتر پشتگوێخرا و چەند جارێک بەرپرسانی ئێران دووپاتیان كردووەتەوە، یاساكە قابیلی جێبەجێكردن نییە. هاوكات دوای دزەكردنی ناوەڕۆكی پرۆژەیاساكە و بڵاوبوونەوەی بەنێو تۆڕە كۆمەڵایەتییەكاندا، ڕەخنەی زۆری لێ گیرا و بە پێشێلكردنی ئاشكرای ئازادییە كەسییەكان، لێكدرایەوە.