چاودێریی بازرگانی: لە ڕۆژانی جەژنیش لە چاودێریكردنی بازاڕ بەردەوام دەبین

ئاڤا نیوز

بەڕێوەبەری چاودێریی بارزگانیی هەولێر ئاشكرای دەكات، تەنیا لە یەك هەفتەدا زیاتر لە حەفت تەن و نیو خۆراكی ماوەبەسەرچوو دەستی بەسەرداگیراوە، جەختیش دەكاتەوە كە تیمەكانیان لە ڕۆژانی جەژنیشدا لە چاودێریكردنی بازاڕ بەردەوام دەبن.

وێنە گەورەكە: لەگەڵ هاتنی هەر جەژن و بۆنەیەك بەشێك لە بازرگان و فرۆشیاران دۆخەكە دەقۆزنەوە و خۆراك و كەلوپەلی ماوەبەسەرچوو بەسەر فرۆشیاران ساغ دەكەنەوە، بۆ ڕێگریكردن لەمە، دامودەزگا پەیوەندیدارەكان لەڕێگەی لیژنە تایبەتەكانەوە چاودێریی وردی بازاڕ دەكەن و ئەو شوێنانە دادەخەن كە سەرپێچی دەكەن.

لێدوانی فەرمی: هۆگر عەلی، بەڕێوەبەری چاودێریی بازرگانیی هەولێر بە ئاڤا میدیای ڕاگەیاند: بە بڕیاری پارێزگای هەولێر، تیمەكانی بەڕێوەبەرایەتییەكەمان لە ڕۆژانی جەژنی قوربانیش گەڕان و پشكنین دەكەن و بەردەوام دەبن بە هاوكاریی ئاسایشی ئابووری و پۆلیسی شارەوانی و لیژنەكانی قایمقامیەت، ئەمەش بۆ ئەوەی هیچ شوێن و فرۆشگەیەك نەتوانێت دۆخەكە بقۆزێتەوە و خۆراك و كەلوپەلی خراپ بفرۆشێت.

- لیژنەكان لە چاودێریكردن زیاتر تیشك دەخەنە سەر خۆراك، بەتایبەت ئەو خۆراك و بابەتانەی كە پەیوەندییان بە ڕۆژانی جەژنەوە هەیە، زیاتر لە هەفتەیەكە گەڕان و سەردانەكانمان چڕتر كردووەتەوە و بەهیچ شێوەیەك ڕێگە نادەین هیچ شوێنێك خۆراكێكی بەسەرچوو و كوالێتیی خراپ بە هاووڵاتی بفرۆشێت.

- لە هەفتەی ڕابردوو هەشت شوێن بەهۆی سەرپێچییەوە داخراون، شوێنێكی دیكەشمان ڕووبەڕووی دادگا كردەوە و لەو ماوەیەشدا حەفت تەن و نیو خۆراكی ماوەبەسەرچوومان لەناوبردووە كە زۆرتر شیرینی و چەرەزات بووە.