شەیبانی: هێرشەکانی ئیسرائیل دەرفەت دەداتە گرووپە چەکدارەکانی سووریا

ئاڤا نیوز

 

وەزیری دەرەوەی سووریا، دوای ئیدانەکردنی هێرشەکانی ئیسرائیل بۆ سەر سووریا، ڕایگەیاند، ئامانجی هێرشەکانی تەلئەڤیڤ تێکدانی سەقامگیریی سووریایە.

 

چیرۆکی سەرەکی: ڕۆژی 3-6-2025، سوپای ئیسرائیل ناوچەکانی باشووری سووریای بۆردوومان کرد. وەک خۆیان بڵاویانکردەوە، ئەو بۆردوومانە لە وەڵامی ئاراستەکردنی دوو مووشەک بووە لە سووریاوە بۆ بەرزاییەکانی جۆڵان.

 

لێدوانی فەرمی: ئەسعەد شەیبانی، وەزیری دەرەوەی سووریا ڕایگەیاند: "هێرشەکانی ئیسرائیل بۆ سەر خاکی سووریا پێشێلکردنی سەروەری سووریایە، دەرفەتێک بۆ ئەو گرووپانە دەرەخسێنێت کە ئارامی و سەقامگیریی سووریا تێکبدەن''.

 

شەیبانی گوتیشی، ''ئێمە هەر لە سەرەتاوە نیازی خۆمان نیشانداوە، ئێمە شەڕمان ناوێ و بەدوای ئاوادانکردنەوەی وڵاتەکەمانین''.

 

زانیاریی زیاتر: دوای کەوتنی دەسەڵاتی بەشار ئەسەد لە ساڵی ڕابردوو، ئیسرائیل ئەمەی بەدەرفەت زانی و چەندین جار هێرشی کردووەتە سەر بنکە و بارەگا سەربازییەکانی سووریا و پێشڕەوی لە خاکی ئەو وڵاتە کردووە، ئەمەش نیگەرانی سووریای لێکەوتووەوە و داوا دەکات، ڕێز لە سەروەری خاکی وڵاتەکەیان بگیرێت.