پشتیوان سادق: هەرێمی کوردستان هەموو پابەندییە دەستوورییەکانی خۆی جێبەجێکردووە

ئاڤا نیوز

 

وەزیری ئەوقاف و کاروباری ئاینی هەرێمی کوردستان لە لێدوانێکی ڕۆژنامەوانیدا ڕایگەیاند، دوای جەژن هەوڵەکان چڕتر دەکرێنەوە بۆ چارەسەرکردنی گرفتی مووچە و ئەو غەدرەی لەسەر کوردستان هەیە.

 

چیرۆکی سەرەکی: ئەنجوومەنی وەزیرانی هەرێمی کوردستان لە دوایین کۆبوونەوەییدا کە ڕۆژی چوارشەممە 4/6/2025 بەڕێوەچوو، بڕیاردرا بە دوو ئاراستە کار لەسەر پرسی مووچە بکرێت، یەکەمیان؛ گرتنەبەری ڕێکاری یاسایی و دەستووری، دووەمیان؛ کارکردن بە ڕێگەی دیپلۆماسی لە ناوخۆ و دەرەوە و ڕوونکردنەوە بدرێتە بە کۆمەڵگەی نێودەوڵەتیی و پشتگیری بەدەست بهێنرێت.

 

لێدوانی فەرمی: پشتیوان سادق، وەزیری ئەوقاف و کاروباری ئایینی هەرێمی کوردستان بە ئاڤای میدیای ڕاگەیاند: حکومەتی هەرێمی کوردستان بە جددی کار لەسەر کێشەی مووچە مووچەخۆران و شایستە داراییەکانی هەرێمی کوردستان دەکات، لە دوای جەژن بە کردەوە هەنگاو دەنێین بۆ لابردنی ئەو سزایە لەسەر خەڵکی کوردستان.

 

- لە بەشێکی دیکەی قسەکانیدا باسی لەوەکرد: بۆ چارەسەرکردنی ئەو کیشەیە لەگەل بەغدا هەوڵی جددی دەدرێت و لەسەر ئاستی کۆمەڵگەی نێودەوڵەتیی و وڵاتانی دونیا لە پەیوەندی دەبین.

 

- حکومەتی هەرێمی کوردستان هەموو پابەندی دەستووری و یاسایی جێبەجێکردووە و ئەوەی لە بەرامبەر هەرێمی کوردستان دەکرێت گەدرێکی گەورەیە و بڕیارێکی نایاسایی و نادەستوورییە.