بەشێکی هاووڵاتییان بەهۆی کارتی نیشتمانییەوە ناتوانن پسووڵەی خۆراک بکەنە ئەلیکترۆنی

ئاڤا نیوز

مانگی داهاتوو دوایین وادەی بەئەلیکترۆنیکردنی پسووڵەی خۆراکە و بەشێکی هاونیشتمانیانیش بەهۆی کارتی نیشتمانییەوە ئاستەنگییان بۆ دروست بووە و ناتوانن پسووڵەکانیان بکەنە ئەلیکترۆنی.

وێنە گەورەکە: لە مانگەکانی داهاتوو پسووڵەی خۆراکی هاووڵاتیان لە سەرانسەری هەرێمی کوردستان و عێراق بەئەلیکترۆنی دەکرێت، چیتر مامەڵەی تۆمارکردنی خێزان لە فۆرمی خۆراک و مامەڵەکانی دیکەی پەیوەست بە بەشەخۆراک بە مامەڵەی کاغەزی ناکرێت.

ئەوەی پێویستە بیزانیت: بۆ ئەوەی فۆرمی خۆراک بەئەلیکترۆنی بکرێت، پێویستە سەرۆک خێزان کارتی نیشتمانیی ئەندامانی خێزان پێشکەش بکات، بەڵام بەشێکی هاووڵاتیان کارتی نیشتمانییان ونکردووە و ناتوانن پسووڵەکانیان بکەنە ئەلیکترۆنی.

لێدوانی فەرمی: سیامەند قادر، بەڕێوەبەری ڕێکخستنی پسووڵەی خۆراکی هەولێر بە ئاڤای ڕاگەیاند: بەبێ کارتی نیشتمانی ناتوانرێت پسووڵەی خۆراک بەئەلیکترۆنی بکرێت، هەرکەسێک کارتی نیشتمانی ونکردووە، پێویستە مامەڵەی وەرگرتنەوەی بۆ بکات، ئەوکات پسووڵەی خۆراک بەئەلیکترۆنی بکات.

ئەو کەسانەی فۆرمی خۆراکیان نییە، دەبێت هۆکارەکەی ڕوون بکەنەوە ئەوکات مامەڵەکانیان بکەن، بۆ نموونە کەسێک لە دەرەوەی وڵات ژیاوە، دەبێت بە بەڵگە ئەوە بسەڵمێنێت، ئەوکات ڕێکارەکانی پڕکردنەوەی فۆرم بکات.