لەسەر کوشتنەوەی ئاژەڵ لە دەرەوەی کوشتارگە 15 قەساب دەستگیر کران

ئاڤا نیوز

ئاماری قایمقامیەتی هەولێر دەریدەخات لەماوەی چوار ڕۆژی جەژنی قورباندا، پۆلیسی قایمقامیەت 15 قەسابیان دەستگیر کردووە و 27 شوێنی فرۆشتنی خۆراک و گۆشتفرۆشییان داخستووە و چوار ئۆتۆمبێلی گواستنەوەی ئاژەڵیش دەستییان بەسەردا گیراوە.

وێنە گەورەکە: لە ڕۆژانی بەر لە جەژن پارێزگای هەولێر هۆشداری بە دانیشتوانی هەولێر دا، بەهۆی بڵاوبوونەوەی تای خوێنبەربوون جگە لە کوشتارگەکان ڕێگا پێدراو نییە ئاژەڵ لە دوکانەکانی گۆشتفرۆشی و ماڵان بکوژرێتەوە.

ڕاگەیێنراوی فەرمی: قایمقامیەتی ناوەندی هەولێر ئاماری چوار ڕۆژی جەژنی بڵاوکردەوە، بەگوێرەی ئامارەکان لە گوندی گردەڕەشە چوار دوکانی گۆشتفرۆشی داخراون، 22 سەر مەڕ دەستی بەسەردا گیراوە، جگە لەوە لەلایەن بەڕێوبەرایەتی ژینگەپارێزییەوە هەزار و 124 تۆن پاشماوەی ئاژەڵی قوربانی فڕێ دراوە.

ژمارەکان وا دەڵێن: بەگوێرەی ئاماری قایمقامیەتی هەولێر لە چوار ڕۆژی جەژنی قورباندا لە کوشتارگەی هاوچەرخی هەولێر هەزار و 461 ئاژەڵ کراوەتە قوربانی، لەو ژمارەیە 270 ئاژەڵی گەورە و هەزار و 191 ئاژەڵی بچووک بوون.

بۆچی گرنگە: لەماوەی ڕابردوودا لە هەرێمی کوردستان پێنج تووشبووی نەخۆشی تای خوێنبەربوون تۆمار کراون، یەکێک لە تووشبووان گیانی لەدەستدا، بەهۆی گواستنەوەی نەخۆشیەکە لە ئاژەڵەوە بۆ مرۆڤ هۆشداری دەدرێت بەبێ دەستکێش و پشکنینی پێشوەختە گۆشتی سوور بەکارنەیەت.