سەرۆک بارزانی: لە دەستدانی کەریم شنگالی کۆستێکی گەورەیە

هەواڵ
10 حوزەیران

شەیری بکە لە:

سەرۆک بارزانی

ئاڤا نیوز

سەرۆک بارزانی لە پەیامێکی هاوخەمیدا بۆ کۆچی دوایی كەریم شنگالی دەلێت، "خوالێخۆشبوو بۆ من هەڤاڵێکی نزیک و هاوڕێی ڕێگەی خەبات بوو، لەدەست دانی كۆستێكی گەورەیە".

چیرۆکی سەرەکی: ئێوارەی ئەمڕۆ سێشەممە 10-6-2025 کەریم شنگالی، ئەندامی مەکتەبی سیاسی پێشووی پارتی و وەزیری پێشووی ناوخۆی هەرێمی کوردستان بە نەخۆشی کۆچی دوایی کرد.

ڕاگەیێنراوی فەرمی: سەرۆك بارزانی پەیامێکی هاوخەمی بۆ كۆچی دوایی كەریم شنگالی ڕاگەیاند، لە پەیەماکەدا هاتووە: بەداخێكی زۆرەوە ئەمڕۆ سێشەممە 10ـی حوزەیرانی 2025 تێكۆشەر و كەسایەتیی خەباتگێڕ و نیشتیمانپەروەری گەلەكەمان و ئەندامی پێشووی مەكتەبی سیاسیی پارتی دیموكراتی كوردستان، كەریم شنگالی بەهۆی نەخۆشییەوە كۆچی دوایی كرد.

- خوالێخۆشبوو كەریم شنگالی لە قۆناغە جیاجیاكانی خەباتی گەلەكەمان و پارتی دیموكراتی كوردستان هەمیشە یەكێك لە كادیرە لێهاتوو و ماندوونەناسەكانی پارتی و بزووتنەوەی ڕزگاریخوازی كوردستان بووە و لە دەستپێک و هەڵگیرساندنی شۆڕشی گوڵاندا فەرماندەیەکی چالاک و سەرەکی بووە و لە سەردەمی خەباتی شاخ و لەدوای ڕاپەڕین و لە كاروباری سیاسی و ئیداری و دیپلۆماسیدا ئەركەكانی خۆی دڵسۆزانە و زۆر بەباشی بەجێگەیاندووە.

- خوالێخۆشبوو كەریم شنگالی پێشمەرگەی ڕێبازی بارزانی و كوردایەتی بوو، "بۆ منیش وەک هەڤاڵێکی نزیک و هاوڕێی ڕێگەی خەبات بوو"، تەمەنی خۆی لەپێناو دۆزی ڕەوای گەلی كوردستان و بەدیهاتنی ئامانجە باڵاكانی گەلی كوردستان تەرخان كرد، لەدەست دانی كۆستێكی گەورەیە.

- "سەرەخۆشی لە خۆمان و خانەوادە و كەسوكار و هەڤاڵانی كەریم شنگالی و سەركردایەتیی و كادیر و ئەندام و لایەنگرانی پارتی و هەموو شۆڕشگێڕ و ئازادیخوازانی كوردستان دەكەم".

- "لە خودای مەزن داواكارم ڕۆحی خوالێخۆشبوو بە بەهەشتی بەرین شاد بكات و سەبر و ئارامی بە هەموو لایەك ببەخشێت".