بەهای تومەنی ئێرانی بەرامبەر دۆلار بەردەوامە لە دابەزین

ئاڤا نیوز

لە دوو ڕۆژی ڕابردوودا هێرشێکی چڕی ئیسرائیل بۆسەر ئێران دەستی پێکردووە بەو هۆیەوە بەهای تومەن بەرامبەر دۆلار زیاتر دابەزیووە، بە جۆرێک بەهای 100 دۆلار بەرامبەر 12 ملیۆن تومەن مامەڵەی پێوە دەکرێت.

وێنە گەورەکە: ماوەی چەند ساڵێکە بەهۆی گەمارۆکانی ئەمریکا بۆسەر ئێران، بەهای دراوەکەشی بەرامبەر دۆلار ساڵ دوای ساڵ حاڵی خراپتر دەبێت. بێ ئەنجامی دانیشتنەکانی دانووسانی ئەتۆمی و هێرشەکانی ئیسرائیل بۆ سەر ئەو وڵاتە بە تەواوی بەهای دراوەکەی لاواز کردووە.

لێدوانی فەرمی: کۆمپانیای تاک نرخ بۆ ئاڵوگۆڕی دراو بە ئاڤا میدیایان ڕاگەیاند، ئەم دوو ڕۆژە مامەڵەکردن بە تومەن زۆر کەمبووەتەوە، نزیکە لە وەستان. ئەمڕۆ فرۆشتنی 100 دۆلار بەرامبەر بە حەوت ملیۆن و 500 هەزار تومەن بووە، کڕینیش 12 ملیۆن تومەن بەرامبەر 100 دۆلارە. کەچی دوێنی کڕینی تومەن بە 15 ملیۆن بوو.

لەلایەکی دیکەوە: ئەم دوو ڕۆژە گۆڕانکاری لە بەهای دیناری عێراقیش بەرامبەر دۆلار ڕوویداوە. غازی جەعفەر، لە ئەنجومەنی بازاڕی دۆلاری هەولێر بە ئاڤا میدیای وت، لە هەولێر و سلێمانی و دهۆک 100 دۆلار بەرامبەر 144 هەزار و 500 دینار مامەڵەی پێوە دەکرێت. بەراورد بە دوو ڕۆژی ڕابردوو زیاتر لە سێ هەزاری هاتووەتەسەر.