داوایەکی خێرای ئەمریکا بۆ ئەو ئەمریکییانەی لە ئێران ماونەتەوە: جێیبێڵن

ئاڤا نیوز

 

وەزارەتی دەرەوەی ئەمریکا داوا لە هاووڵاتییانی وڵاتەکەی دەکات بەهیچ شێوەیەک گەشتی ئێران نەکەن، ئاگاداریشیان دەکاتەوە کە ئەگەر لەوێش بوون، دەستبەجێ ئەو وڵاتە جێبهێڵن.

 

وێنە گەورەکە: بەهۆی جەنگی نێوان ئیسرائیل و ئێران و هێرشی مووشەکی و درۆنی بۆ سەر یەکدی، دۆخی ئەو دوو وڵاتە ناجێگیرە، کە بووەتە هۆی کوژرانی دەیان کەس و برینداربوونی سەدانی دیکە لە هەردوولا، وڵاتانی جیهانیش داوایان لە هاووڵاتیانی خۆیان کردووە بۆ سەلامەتی ژیانی خۆیان ئەو دوو وڵاتە بەجێبهێڵن یان گەشتیان بۆ نەکەن.

 

ڕاگەیێراوی فەرمی: لە ڕاگەیێنراەکەی وەزارەتی دەرەوەی ئەمریکا هاتووە، "ئەو هاووڵاتییە ئەمریکییانەی کە ناتوانن ئێران جێبهێڵن، پێویستە ئامادەبن بۆ ماوەیەکی درێژ لە شوێنی خۆیان وەک پەناگە بەکاربهێنن". 

 

وەزارەتی دەرەوەی ئەمریکا هۆشداریش دەدات، کە هاووڵاتیانی ئەمریکا لە ئێران بەهۆی بەرزبوونەوەی گرژییەکانی ناوچەکە ڕووبەڕووی مەترسیی جددی و زیاتر دەبنەوە. 

 

ئەوەی ئێستا ڕوودەدات: کەمێک پێش ئێستا زەنگی مەترسی لە تەلئەڤیڤی پایتەختی ئیسرائیل لێدرا، ئەمەش دوای ئەوەی ئێران ژمارەیەک درۆن و مووشەکی بالیستیکی ئارەستەی ئەو وڵاتە کرد. ئەم هێرشە  لەکاتێکدایە، ئیسرائیل  چەند پێگە و شوێنێکی  لە ژمارەیەک شاری جیاوازی ئێران بە ئامانج گرت، کە دەگوترێت یەکێکیان بینای وەزارەتی بەرگریی ئێرانە.