پڕۆسەی گەڕانەوەی حاجییانی کوردستان خێراتر دەکرێت

ئاڤا نیوز

 

بەهۆی جەنگی نێوان ئیسرائیل و ئێران شێوازی گەڕانەوەی حاجییانی هەرێمی کوردستان لە سعودییاوە گۆڕانکاری بەسەرداهاتووە و پڕۆسەکەش خێراتر دەکرێت.

 

چیرۆکی سەرەکی: بەهۆی بەردەوامی ڕووبەڕووبوونەوەی نێوان ئێران و ئیسرائیل، گەشتە ئاسمانییەکانی عێراق و ناوچەکە تا هێوربوونەوەی دۆخەکە ڕاگیراون، ئەمەش گەڕانەوەی حاجییانی لە ڕێگەی فڕۆکەوە ڕاگرتووە و دەستەی حەج و عومەری عێراقیش بڕیاریداوە سەرجەم ئەو کەسانە لە ڕێگەی سعودییاوە بگەڕێنێتەوە. 

 

لێدوانی فەرمی: کاروان ستوونی، وتەبێژی بەڕێوەبەرایەتیی گشتیی حەج و عومرەی هەرێمی کوردستان بە ئاڤای گوت: هەموو حاجییانی هەرێمی کوردستان شاری مەککەیان جێهێشتووە، ئەو حاجییانەی بە فرۆکە گەشتیان کردبوو، کاروانی یەکەمییان گەیشتنەوە هەرێمی کوردستان و ئەوانەشی ماونەتەوە، ئەمڕۆ و سبەی لە شاری مەدینەوە بە ڕێگەی وشکانی دەگەڕێنەوە.

 

- لە بەشێکی دیکەی قسەکانیدا باسی لەوەشکرد، بڕیاربوو تا ڕۆژی 20ی ئەم مانگە سەرجەم حاجییان بگەڕینرێنەوە، بەڵام بە هەوڵی بەردەوامی سەرۆکوەزیران توانرا گەڕاندنەوەیان خێراتر بکرێت و کاتەکەی پێشخراوە.


باکگراوند: بەمەبەستی بەجێهێنانی فەریزەی حەجی ئەمساڵ، پێنج هەزار و 136 کەس لە هەرێمی کوردستانەوە ڕوویان لە وڵاتی سعودییە کردووە کە هەزار و 646 کەسیان لە ڕێگەی وشکانییەوە گەشتیان کردووە و سێ هەزار و 490 کەسی دیکەش لە ڕێگەی ئاسمانی گەشتەکەیان کردووە.