ئاژانسی نێوده‌وڵه‌تی وزه‌ی ئه‌تۆم: زیان به‌ بنكه‌ی ئەتۆمی نه‌ته‌نز گه‌یشتووه‌

ئاڤا نیوز

ئاژانسی نێودەوڵەتی وزەی ئەتۆم بەئامانجگرتنی بنکە ئەتۆمییەکانی ئێران پشتڕاست دەکاتەوە و ئاماژە بە زیان بەرکەوتنی بنکەی ئەتۆمی نەتەنز دەکات.

وێنە گەورەکە: بەرەبەیانی ڕۆژی هەینی ئیسرائیل هێرشێکی بەرفراوانی کردە سەر دامەزراوە ئەتۆمییەکانی ئێران و ماڵی چەندین سەرکردەی سوپای پاسدارانیشی بە ئامانج گرت، بنیامین نەتانیاهۆ، سەرۆکوەزیرانی ئیسرائیل سەبارەت بە هێرشەکان ڕایگەیاند، لە ناوبردنی تەواوی بنکە ئەتۆمییەکانی ئێران ئامانجیانە.

بڵاوکراوەی فەرمی: ئاژانسی نێوده‌وڵه‌تی وزه‌ی ئه‌تۆمیی سەر بە نەتەوە یەکگرتووەکان ئه‌مڕۆ سێشه‌ممه‌ لە بڵاوکراوەیەکی فەرمیدا ڕایگەیاند: به‌پشتبه‌ستن به‌شیكاری‌ وێنه‌ی‌ مانگه‌ ده‌ستكرده‌كان كه‌ دوای‌ هێرشه‌كه‌ی‌ هه‌ینی‌ ڕابردووی‌ ئیسرائیل كۆكراونه‌ته‌وه‌، ئاژانسی نێوده‌وڵه‌تی وزه‌ی ئه‌تۆم توخمی زیاده‌ی ده‌ستنیشان كردووه‌ كه‌ ئاماژه‌ن بۆ دروستبوونی‌ كاریگه‌ریی ڕاسته‌وخۆ له‌سه‌ر هۆڵه‌كانی پیتاندنی ژێر زه‌وی‌ له‌ دامه‌زراوه‌ی نه‌ته‌نز.

لە درێژەی بڵاوکراوەکەی ئاژانسی نێودەوڵەتی وزەی ئەتۆم هاتووە، ده‌ركه‌وتووه‌ كه‌ زیان به‌ به‌شی پیتاندنی یۆرانیۆم له‌ بنكه‌ی ئه‌تۆمی نه‌ته‌نزی ئێران گه‌یشتووه‌، به‌ڵام هیچ گۆڕانكارییه‌ك له‌ دۆخی بنكه‌كانی‌ ئیسفه‌هان و فۆردۆ ڕووینه‌داوه‌.