ئێران هێرشێکی نوێی مووشەکی بۆ سەر ئیسرائیل دەستپێدەکات

ئاڤا نیوز

شەپۆلێکی نوێی مووشەک و درۆنی ئێرانی بۆ سەر شارە جیاوازەکانی ئیسرائیل دەستی پێکرد.

چیرۆکی سەرەکی: ماوەی پێنج ڕۆژە جەنگی نێوان ئیسرائیل و ئێران بەردەوامە، تاوەکو ئێستا هەردوولا بە تووندی هێرش دەکەنە سەر یەکتری، کەمێک پێش ئێستا ئێران لە وەڵامی هێرشە بەردەوامەکانی ئیسرائیل بۆ سەر وڵاتەکەی، ژمارەیەک مووشەکی بالیستی و درۆنی ئاراستەی ئیسرائیل کرد.

ڕاگەیێنراوی فەرمی: میدیای فەرمی ئێران بە پشتبەستن بە سەرچاوەکانی سوپای پاسداران ڕایگەیاند، ئەو وڵاتە گەڕی دەیەمی هێرشە مووشەکییەکانی بۆ سەر ئیسرائیل ئەنجام دا.

 بە گوێرەی ئاژانسی هەواڵیی تەسنیم، لەم هێرشانەدا ژمارەیەکی زۆر مووشەکی بالیستی و درۆنی ئێرانی بەرەو "ئامانجی گرنگ و ستراتیژی" لە ناو خاکی ئیسرائیل ئاراستە کراون.

ئەوەی پێویستە بیزانیت: ئێران لە ئۆپەراسیۆنی 'بەڵێنی ڕاست – ٣' هێرش دەکاتە سەر ئیسرائیل و وەڵامی هێرشەکانی چەند ڕۆژی ڕابردووی ئەو وڵاتە دەداتەوە. 

لەلایەکی دیکەوە: میدیاکانی ئیسرائیل ڕایانگەیاند، ژمارەیەک مووشەکی  ئێرانی بە ئاراستەی ناوچەکانی نەقەب و بیئر سەبع و دیمۆنا هەڵدران.