وەزیری دەرەوەی ئیسرائیل: بە کاتێکی زۆر سەختدا تێدەپەڕین

ئاڤا نیوز

 

لەکاتێکدا جەنگی ئیسرائیل و ئێران بە سەختی بەردەوامە، وەزیری دەرەوەی ئیسرائیل قۆناغی ئێستای جەنگ بە سەخت ناوزەند دەکات.

 

وێنە گەورەکە: لەکاتێکدا شەش رۆژ تێپەڕیوە بەسەر دەستپێکی هێرشی ئیسرائیل بۆ سەر ئێران، شەڕ بە سەختی بەردەوامە، هەردوولا مووشەک ئاراستەی یەکتر دەکەن و هەریەک لە ئیسرائیل و ئەمریکاش داوای چۆڵکردنی تاران دەکەن، لە بەرامبەردا ئێران داوای چۆڵکردنی تەلئەبیب و هەیفا دەکات.

 

لێدوانی فەرمی: جەدعون ساعر، وەزیری دەرەوەی ئیسرائیل رایگەیاند: بڕیاری جەنگ بڕیارێکی مێژوویی بوو، هەرچەندە دەمانزانی تووشی زیانی گەورە دەبین و ئێستا ڕووخاندنی ڕژێمی دەسەڵاتداریی ئێران ئامانجی جەنگ نییە، بەڵام دەکرێت ئەنجامی جەنگەکە بێت.

 

هەروەها گوتی ئیسرائیل بە کاتێکی زۆر سەختدا تێدەپەڕێت، بەڵام گەلی ئیسرائیل پشتیوانی لە جەنگەکە دەکات و بەردەوام دەبین.

 

ئەمەش بزانە: جگە لە ئێران، ئیسرائیل لە هەمان کاتدا لە شەڕی دژی بزووتنەوەی حەماس لە غەززە، حوسییەکانی یەمەن و حیزبوڵڵای لوبنانیش بەردەوامە.

 

تێچووی شەڕ لەسەر ئیسرائیل: تاوەکو ئێستا ئاماری فەرمی لەبارەی خەرجیی ئیسرائیل لەو شەڕانەیدا نییە، بەڵام مەزەندە دەکرێت نزیکەی 46 ملیار دۆلاری لە بودجەی ساڵانی 2024 و 2025ـی بۆ شەڕ تەرخان کردبێت.

 

ئیسرائیل هەروەها ئاشکرای کردووە لە رۆژانی 13 و 14ـی 6-2025 نزیکەی 150 شوێنی لە ئێران بۆردوومان کرد، بۆ ئەو مەبەستەش نزیکەی 200 فڕۆکە و سەدان چەک و ئامێری زیرەکی بەکارهێناوە، کە بووەتە هۆی لەنێوبردنی 30 سەکۆی هەڵدانی مووشەک و سێ جبەخانەی تایبەت بە مووشەک.