لە جنێڤ کۆبوونەوەیەکی ئەوروپی - ئێرانی بە هەماهەنگی ئەمریکا دەکرێت

ئاڤا نیوز

سەرچاوەیەکی ئەڵمانیی بە ئاژانسی ڕۆیتەرزی ڕاگەیاندووە، ڕۆژی هەینی وەزیرانی دەرەوەی ئەڵمانیا، بەریتانیا و فەڕەنسا لە شاری جنێڤی سویسرا لەگەڵ عەباس عێراقچی، وەزیری دەرەوەی ئێران بۆ گفتوگۆکردن لەسەر بەرنامە ئەتۆمییەکەی ئەو وڵاتە کۆدەبنەوە، کۆبوونەوەکەش بە هەماهەنگی ئەمریکا دەبێت.

وێنە گەورەکە: هەرچەندە وڵاتانی ئەوروپا پشتیوانی هەوڵەکانی ئەمریکان بۆ ئەوەی ئێران نەبێتە خاوەن چەکی ئەتۆم بۆ ئەو مەبەستەش فشار لە تاران دەکەن بۆ سەر مێزی دانوستان بگەڕێتەوە، بەڵام دژی بژاردەی سەربازیین و دەیانەوێت بە زووترین کات جەنگ ڕابگرێت.

زانیاریی بەدەستهاتوو: ئاژانسی هەواڵی ڕۆیتەرز لە سەرچاوەیەکی ئەڵمانییەوە باسی لەوەكردووە، لە کۆبوونەوەکەدا وڵاتانی ئەوروپا دەیانەوێت ئێران ڕازی بکەن گەرەنتی تەواو پێشکەش بکات بۆ ئەوەی بەرنامە ئەتۆمییەکەی تەنیا بۆمەبەستی ئاشتی بەکاردەهێنێت، بۆ ئەو مەبەستەش دواتر گفتوگۆ لەنێوان هەردوولا لە ئاستی پسپۆڕانی بوارەکە ئەنجام دەدرێت.

لەلایەکی دیکەوە: عەباس عێراقچی، وەزیری دەرەوەی ئێران ڕۆژی چوارشەممە ئاشکرای کرد کە وڵاتەکەی پابەندە بە چارەسەری دیپلۆماسیی، بەرپرسێکی باڵای ئەو وڵاتەش ڕایگەیاند، تاران بەمزووانە دەستپێشخەرییەکەی سەرۆکی ئەمریکا بۆ کۆبوونەوە پەسەند دەکات.