عێراقچی: ئیسرائیل باجی هێرشەکانی دەداتەوە

ئاڤا نیوز

وەزیری دەرەوەی ئێران لەبارەی هێرشەکانی ئیسرائیل بۆ سەر وڵاتەکەی جەخت لە هەڵوێستی ڕوونی وڵاتەکەی دەکاتەوە و ئاشكرای دەکات ئیسرائیل باجی هێرشەکانی دەداتەوە.

وێنە گەورەکە: ماوەی هەفتەیەکە ئیسرائیل ئۆپەراسیۆنی سەربازی دژ بە ئێران ئەنجام دەدات و ئامانجیش لێی ڕێگرییکردنە لە بەرنامە ئەتۆمییەکەی، ئێرانیش بەردەوامە لە وەڵامدانەوە و بۆردومانکردنی ئامانجەکانی لە ئیسرائیل.

بڵاوکراوەی فەرمی: عەباس عێراقچی، وەزیری دەرەوەی ئێران لە ئێکس ڕاگەیاند، ئێران بەردەوام دەبێت لە بەکارهێنانی مافی بەرگریکردن لە خۆی، ئەوان پەشیمان دەبن لە هەڵە کوشندەکە و باجەکەشی دەدەن.

لە درێژەی نووسراوەکەیدا عێراقچی ئیسرائیل بەوە تۆمەتبار دەکات کە دەیەوێت ئاگری جەنگەکە لە ناوچەکە و دەوروبەریشی فراوانتر بکات.

ئەوەی پێویستە بیزانیت: لە ڕۆژی حەوتەمی جەنگ، ئێران شەپۆڵێکی نوێی مووشەکی ئاراستەی ئیسرائیل کرد، بەهۆیەوە باڵەخانەیەک لە نەخۆشخانەی سۆرۆکا کە بریندارانی جەنگی غەززەی تێیدا چارەسەر دەکران بە تەواوی داڕما.