سەدر: ئەمریکا هەر بڕیارێک دژی باوەڕداران دەربکات بە زیانی خۆی دەشکێتەوە

ئاڤا نیوز

ڕێبەری ڕەوتی نیشتمانی شیعە لە پەیامێکدا ئاماژە بۆ ئەوە دەکات، چارەنووسی ئەمریکا و ئیسرائیل بە "شکست و زیان" کۆتایی دێت بە هەمان شێوەی بڕیارەکانیان لە ڕابردوودا.

چیرۆکی سەرەکی: دوای نوێژی هەینی لەسەر بانگەوازی ڕێبەری ڕەوتی نیشتمانیی شیعە، خۆپیشاندان لە سەرجەم ناوەندی پارێزگاکان بۆ سەرکۆنەکردن و وەستان لە دژی هێرشەکانی ئیسرائیل و پێشێلکردنی ئاسمانی عێراق بەڕێوەچوو.

پەیامی فەرمی: لە میانی بەڕێوەچوونی نوێژی هەینی لە شاری سەدری بەغدا، پەیامی موقتەدا سەدر، ڕێبەری ڕەوتی نیشتمانیی شیعە خوێندرایەوە، لە پەیامەکەدا سەدر ئاماژە بە وتارێکی کۆنی محەممەد سادق سەدری باوکی لەسەر مینبەری مزگەوتی گەورەی کوفە دەکات و باس لەوە دەکات کە هەر بڕیارێک سەرۆکی ئەمریکا دەریبکات، بە "حیکمەت و قودرەتی خودایی" لەسەر خۆی دەشکێتەوە و تووشی "شکست و زیانی"ـی دەکات، هەروەک چۆن پێشتر بۆ "کارتەر و بووش ڕوویدا بەرامبەر ستەمەکانیان لەسەر باوەڕداران لە ڕۆژهەڵات."

لە هەمان کاتدا: سەدر لە پەیامەکەیدا جەخت لەوە دەکاتەوە، سەرەڕای دڕندەیی ئیسرائیل، ناتوانن هێرش بکەنە سەر کۆماری ئیسلامیی ئێران و پێش ئەوانیش لوبنان، سووریا و فەڵەستین و یەمەن، مەگەر بە بڕیارێکی شێتانەی ترەمپ نەبێت.