دادوەر ڕزگار محەممەد ئەمین: سەرۆکی دادگای فیدراڵی دەتوانێت فەرمان سالاری لەبارەی مووچە دەربکات

ئاڤا نیوز

دادوەر ڕزگار محەممەد ئەمین تایبەت بە ئاڤا ڕایدەگەیێنێت، دەركردنی فەرمانی سالاری (ئەمری وەلائی) بۆ خەرجكردنی مووچەی مووچەخۆرانی هەرێمی كوردستان، پرسێكی تەواو یاسایی و ڕەوایە و دەستلەکارکێشانەوەی ئەندامانی دادگای فیدراڵی، ڕێگر نییە لە دەرکردنی فەرمانەكە لەلایەن سەرۆكی دادگاكەوە.

وێنە گەورەكە: لەکاتێکدا بڕیار بوو ڕۆژی پێنجشەممەی ڕابردوو، دادگای باڵای فیدراڵی عێراق لەبارەی مووچە کۆببێتەوە و فەرمانێکی سالاری بۆ خەرجکردنی مووچەی مووچەخۆرانی کوردستان بدات، ئەندامانی دادگای فیدراڵی بەکۆمەڵ دەستیان لەکار کێشایەوە، ئەمەش پرسی چارەسەرکردنی کێشەی مووچەی لەنێوان هەولێر و بەغدا ئاڵۆز کردووە.

لێدوانی فەرمی: دادوەر ڕزگار محەممەد، پێشتر سەرۆكایەتیی دادبینیی كەیسی سەددام حوسێن، سەرۆككۆماری پێشووتری عێراقی دەكرد، لە لێدوانێكی بۆ ئاڤا باس لە دەركردنی فەرمانی سالاری دەكات و دەڵێت، دەركردنی فەرمانەكە نابێت لە ڕۆژێك زیاتر دوا بكەوێت.

ڕوونیشی دەكاتەوە، دەستلەکارکێشانەوەی ئەندامانی دادگەی فیدڕاڵی ڕێگر نییە لە دەرکردنی فەرمان بۆ خەرجکردنی مووچەی هەرێمی كوردستان.

زانیاریی زیاتر: سەرۆکی دادگای فیدراڵی بە تەنها دەتوانێت فەرمانەکە دەربکات، پاڵپشت بە بڕیارێکی پێشتری دادگەكە كە جەخت لە خەرجکردنی مووچە دەکاتەوە.

ئەوەی پێویستە بیزانیت: دوورترین وادە بۆ دەرکردنی فەرمانی سالاری لەبارەی مووچە، نابێت ڕۆژێک زیاتر لەوادەی پێشکەشکردنی داواکارییەکە تێپەڕ بێت، بەو پێیەی ئەمری ولائی خەسڵەتی خێرایی هەیە بۆ لادانی ڕێكارێكی نایاسایی كە كاریگەری لەسەر ڕەوتی شەرعییەتی بڕیاری دادگاوە هەیە.

ئەوەی لەبارەیەوە دەوترێت: چەند سەرچاوەیەك باس لەوە دەكەن، ئاماژەكان بەو ئاراستەیەن كە ئەم هەفتەیە، سەرۆكایەتیی دادگای باڵای فیدراڵی فەرمانی سالاری بۆ خەرجكردنی مووچەی هەرێمی كوردستان دەربكات.

باكگراوند: سەرەڕای تێپەڕبوونی زیاتر لە 20 ڕۆژ بەسەر مانگی پێنج، تاكو ئێستا مووچەی مووچەخۆرانی هەرێمی كوردستان لەلایەن بەغداوە ڕەوانە نەكراوە، ئەوەش دوای نووسراوێكی وەزارەتی دارایی عێراق بە ڕاگرتنی مووچەی هەرێمی كوردستان بەبیانووی ئەوەی پشكی هەرێمی كوردستان لە بودجە هەمووی دراوە.