ترەمپ: ئێران هەموو پێداویستییەکی لە بەردەستە بۆ دروستکردنی چەکی ئەتۆم

ئاڤا نیوز

سەرۆکی ئەمریکا بۆ جارێكی دیکە وتەکانی سەرۆکی هەواڵگریی ئەمریکای سەبارەت بە بەرنامەی ئەتۆمی ئێران بە ناڕاست ناوزەند کرد و وتی، ئێران ئێستا هەموو پێداویستییەکی لە بەردەستە بۆ دروستکردنی چەکی ئەتۆم.

وێنە گەورەکە: تۆڵسی گابارد، سەرۆکی هەواڵگریی نیشتیمانیی ئەمریکا دوای بڵاوکردنەوەی زانیارییەکان سەبارەت بە بەرنامەی ئەتۆمی ئێران جەختی لەسەر نەبوونی بەڵگەی پێویست کردەوە بۆ نزیکی ئێران لە دروستکردنی چەکی ئەتۆم، سەرۆکی ئەمریکا دوای چەندین جار ڕەتکردنەوەی زانیارییەکانی هەواڵگریی نیشتیمانی، شەوی ڕابردوو لە کۆنگرەیەکی ڕۆژنامەوانیدا جارێکی دیکە زانییارییەکانی تۆڵسی گاباردی بە ناڕاست لە قەلەمدا.

لێدوانی فەرمی: دۆناڵد ترەمپ، سەرۆکی ئەمریکا لە وەڵامی پرسیاری ڕۆژنامەنووساندا سەبارەت بە ڕاپۆرتی هەواڵگریی نیشتیمانیی ئەمریکا گووتی: هەر کەسێک ئەم زانییاریانەی بڵاوکردبێتەوە هەڵەی کردووە، سەرۆکی هەواڵگریی نیشتیمانی زانیارییەکانی ناڕاستن و ئێران ئێستا هەموو پێداویستییەکی لە بەردەستە بۆ دروستکردنی چەکی ئەتۆم و ماوەیەکی زۆر کەمییان پێویستە بۆ ئەوەی بگەن بەو قۆناغە.

 ئەوەی پێویستە بیزانیت: سەرەتای ئەم مانگە دوای ئەوەی سەرۆکی هەواڵگریی نیشتیمانیی ئەمریکا ڤیدیۆیەکی کورتی سەبارەت بەسەردانەکەی بۆ هیرۆشیما لە سۆشیال میدیا بڵاوکردەوە، باسی مەترسییەکانی چەکی ئەتۆمی کرد، ئەم ڤیدیۆیە ترەمپی تووڕە کرد و داوای کرد بە هیچ شێوەیەک قسە سەبارەت بە مەترسیەکانی ئەتۆم نەکات و خەڵک تووشی ترس و دڵەڕاوکێ نەکات.

زانیاریی زیاتر: بەرنامەی ئەتۆمی ئێران ناکۆکییەکەی نێوان گابارد و ترەمپی قووڵتر کردەوە، کاتێک بۆ جاری یەکەم زانیارییەکانی سەبارەت بە بەرنامەی ئەتۆمی ئێران بڵاو کردەوە، دواتر لە ژێر فشاری سەرۆکی ئەمریکا ناچار بە ئەنجامدانی کۆنگرەیەکی ڕۆژنامەوانی کرا و نزیکی ئێرانی لە دروستکردنی چەکی ئەتۆم ڕاگەیاند، بەڵام سەرۆکی ئەمریکا لە دوایین لێدوانیدا جارێکی دیکە وتەکانی سەبارەت بە نەبوونی بەڵگە لەسەر بەرنامەی ئەتۆمی ئێران بۆ دروستکردنی چەکی ئەتۆم ڕەتکردەوە و بە ناڕاست ناوزەندی کرد و گوتی، "ئەو سەرۆکی هەواڵگریی نیشتیمانی خۆمە، بەڵام قسەکانی ڕاست نین".