باڵیۆزخانەی ئەمریکا لە بەغدا هەنگاوێکی خۆپارێزی خێرا دەگرێتەبەر

ئاڤا نیوز


باڵیۆزخانەی ئەمریکا لە عێراق لە هەنگاوێکی خێرای خۆپارێزیدا ژمارەی کارمەندەکانی کەمدەکاتەوە دەیانگوازێتەوە بۆ  ناوچەیەکی سەلامەت. 

زانیاریی بەدەستهاتوو: باڵیۆزخانەی ئەمریکا لە بەغدا هەنگاوێکی بەپەلە و خێرا دەگرێتەبەر، ژمارەی کارمەندانی زیاتر کەمدەکاتەوە و دەیانگوازێتەوە بۆ ناوچەیەکی سەلامەت. 

چیرۆکی سەرەکی: بەرەبەیانی ئەمڕۆ یەکشەممە دۆناڵد ترەمپ، سەرۆکی ئەمریکا  لە پلاتفۆرمی سۆشیال تروس ڕایگەیاند، بەسەرکەوتوویی هێرشمان کردە سەر سێ پێگەی ئەتۆمییەکانی ئێران، کە پێکدێن لە نەتەنز، فۆردۆ و ئەسفەهان، هەموو فڕۆکەکان گەڕانەوە بنکەکانیان و ئاسمانی ئێرانیان جێهێشت، هێرشەکان لە ڕێگەی بڕێکی زۆر بۆمب کراونەتە سەر پێگەی سەرەکیی فۆردۆ.

زانیاریی پەیامنێر: دەروون مەلا ناجی، پەیامنێری ئاڤا لە بەغدا ڕایگەیاند: وەکو ئامادەکارییەک بۆ ئەگەر پێشگرتن لە هەر ڕووداوێکی نەخوازراو، دەسەڵاتدارانی بەغدا پشتێنەیەکی ئەمنییان لە دەورووبەری باڵیۆزخانەی ئەمریکا لە بەغدا دروستکردووە، ئەمەش لە ترسی مەترسی هێرشی گرووپە چەکدارەکانی نزیک لە ئێران بۆ سەر ناوچەی سەوز.

لەلایەکی دیکەوە: دوا بەدوای ‌هێرشە بەرفراوانەکەی ئەمریکا بۆ سەر دامەزراوە ئەتۆمییەکانی ئێران، میدیای ئێران ئاشکرای دەکات، بەرەبەیانی ئەمڕۆ  22-6-2025 ، ئێران 30 مووشەکی ئاراستەی ئیسرائیل کرد.

 

نوێدەکرێتەوە..