کۆمیسیۆنی باڵای سەربەخۆی هەڵبژاردنەکان دەرگای تانەدان دەکاتەوە

ئاڤا نیوز


کۆمیسیۆنی باڵای سەربەخۆی هەڵبژاردنەکانی عێراق، بۆ ماوەی حەوت ڕۆژ دەرگای تانەدانی کردووەتەوە بۆ وەرگرتنی هەر تێبینی و ناڕەزایەتییەک لەسەر تۆماری دەنگدەران. 

 

وێنە گەورەکە: بڕیارە 11ی تشرینی دووەمی ئەمساڵ هەڵبژاردنی پەرلەمانی عێراق بکرێت، بۆ ئەم مەبەستە کۆمسیۆن بەپێی خشتەی ئامادەکارییەکانی هەڵبژاردن، دەستی بە جێبەجێکردنی ڕێکار و ئامادەکارییەکان کردووە.

 

چیرۆکی سەرەکی: کۆمسیۆن لە 25ی ئادار تا 20ی ئەم مانگە، لە هەزار و 79 ناوەندی تۆمارکردن، دەرگای نوێکردنەوەی تۆماری دەنگدەرانی کردەوە، لەو ماوەیەدا دوو ملیۆن و 155 هەزار و 97 کەس زانیارییەکانیان لە تۆماری دەنگدەران نوێکردەوە، هەر تانەیەکیش لەو نوێکردنەوەیە هەبێت کۆمسیۆن لە ماوەی حەوت ڕۆژ وەریان دەگرێت.

 

لێدوانی فەرمی: مەڕوان محەممەد، بەڕێوەبەری ئۆفیسی هەولێری کۆمیسیۆن بە ئاڤای گوت: هەرکەسێک تانە یان ناڕەزایەتیی هەبێت لەسەر نوێکردنەوەی تۆماری دەنگدەران لە تۆمارکردنی کەسێک کە مافی دەنگدانی نەبێت، فۆرمێکی تایبەت لە ناوەندەکانی نوێکردنەوەی تۆماری دەنگدەران دانراوە، لە ماوەی حەوت ڕۆژ تانە و ناڕەزایەتییەکان وەردەگیرێن و کۆمسیۆن کاریان لەسەر دەکات، بە مەرجێک ئەو کەسەی تانەی هەیە دەبێت بەڵگەکانی لەگەڵ فۆرمەکە پیشکەش بکات.

 

زانیاریی زیاتر: پێشکەشکردنی تانە و ناڕەزایەتییەکان ئەمڕۆ دەستپێدەکات و لە 28ی ئەم مانگە کۆتایی دێت.