دەستەی عێراق بۆ چاودێریی ئەتۆم بۆ ئاڤا: تیشكدانەوەی ئەتۆمی تۆمارنەکراوە

ئاڤا نیوز 

 

لەکاتێکدا هێرشکردنە سەر وێستگە ئەتۆمییەکانی ئێران بەردەوامە، دەستەی عێراقی بۆ چاودێریی ئەتۆم بە ئاڤای گوت "تائێستا هیچ تیشكدانەوەیەکی ئەتۆمی لە عێراق تۆمارنەکراوە و هەموو پێوانەکانی لە ئاستی سرووشتیی خۆیانن."

 

وێنە گەورەکە: لە پێشهاتێکی نوێدا و لە 10ـیەمین ڕۆژی جەنگی نێوان ئیسرائیل و ئێران، سەرلەبەیانیی ئەمڕۆ ئەمریکا سێ دامەزراوە سەرەکییەکەی تایبەت بە بەرنامە ئەتۆمییەکەی ئێران (فۆردۆ، ئەسفەهان و نەتەنز)ـی کردە ئامانج، ئەوەش کاردانەوەی لەسەر ئاستی جیهان لێکەوتەوە و وەک پێشهاتێکی "مەترسیدار" ناوی دەبەن.

 

لێدوانی فەرمی: د. ئەحمەد خزەیر، گوتەبێژی دەستەی چاودێریکردنی وزەی ئەتۆم لە عێراق بە ئاڤا میدیای راگەیاند "تائێستا هیچ ئاماژەیەکی مەترسیداری تیشکدانەوە و دزەکردنی ئەتۆم، لەئەنجامی هێرشەکانی ئەمریکا بۆ سەر وێستگە ئەتۆمییەکانی ئێران، لە عێراق تۆمار نەکراوە".

 

هەروەها دەڵێ "سەرجەم پێوانەکان لە ئاستی ئاسایی خۆیاندان و هیچ ئاماژەیەکی ناسرووشتی تۆمارنەکراوە. تیمە جیاوازەکانمان رۆژانە 24 کاتژمێر، لە ناوچە سنوورییەکان چاودێریی دۆخەکە دەکەن." 

 

وردەکاریی زیاتر: عێراق لە ساڵی 2022 چەندین ئامێری نوێی تۆمارکردنی تیشکدانەوەی ئەتۆمیی کڕیوە، کە لە پارێزگاکانی عێراق، هەولێر و سلێمانیش دانراون و رۆژانە سێ راپۆرت دەدەن. 

 

ژوورێکی ئۆپەراسیۆن تایبەت بە تیشکدانەوەی ئەتۆمی لە عێراق هەیە، کە هەفتەیەک لەمەوبەر لەسەر فەرمانی محەممەد شیاع سوودانی، سەرۆکوەزیرانی عێراق چالاککرایەوە.