ئەڵمانیا: پێویستە ئێران ڕاستەوخۆ لەگەڵ ئەمریکا گفتوگۆ بکات

ئاڤا نیوز

وەزیری دەرەوەی ئەڵمانیا لەبارەی هێرشەکانی ئەمریکا بۆ سەر ئێران جەخت لە ڕۆڵی یەکێتیی ئەوروپا بۆ نێوەندگیری دانوستانەکانی ئێران و ئەمریکا دەکاتەوە، دەشڵێت پێویستە ئێران ڕاستەوخۆ لەگەڵ ئەمریکا گفتوگۆ بکات.

وێنە گەورەکە: تەنیا دوو ڕۆژ پێش بەڕێوەچوونی گەڕی شەشەمی دانوستانەکانی نێوان ئێران و ئەمریکا، ئیسرائیل ئۆپەراسیۆنە سەربازییەکەی دژ بە ئێران دەستپێکرد و لەماوەیەکی کەمدا چەندین فەرماندەی باڵای سوپای پاسداران و زانای ئەتۆمی وڵاتەکەی بە ئامانج گرت و هەر بەمەش نەوەستا لە دەیەم ڕۆژی جەنگەکە، ئەمریکا بڕیاری هێرشکردنە سەر دامەزراوە ئەتۆمییەکانی ئێرانی دا بە بەکارهێنانی بۆمبی GBU-57 و چەندین مووشەکی بۆ  لەناوبردنی بنکەی فۆردو و نەتەنز و ئەسفەهان بەکارهێنا.

لێدوانی فەرمی: یۆهان ڤادێفول، وەزیری دەرەوەی ئەڵمانیا ڕایگەیاند، ئێران دەڵێت تەنیا دەیەوێت دانوستان لەگەڵ ئەوروپا بکات و ئێمە ئەوە بە نیشانەیەکی باش دەبینین، بەڵام ئەوە بەس نییە، دەمانەوێت ئەمریکا بەشدار بێت، بۆیە ئێران پێویستی بە دانوستانی ڕاستەوخۆ لەگەڵ ئەمریکا هەیە. بانگەوازی خۆم نوێ دەکەمەوە کە ئێران ئامادە بێت بۆ گفتوگۆ، لەگەڵ ئەمریکاش لەپەیوەندیدا دەبین.