تەندروستی غەززە توانای چارەسەرکردن و لەخۆگرتنی نەخۆش و بریندارانی نەماوە

ئاڤا نیوز

کەرتی تەندروستی لە غەززە گەیشتووەتە خاڵی داڕمان بەشێوەیەک توانای چارەسەرکردن و لەخۆگرتنی نەخۆش و بریندارانی نەماوە، لە هەمان کاتدا 14 هەزار نەخۆش و بریندار پێویستیان بە چارەسەرە لە دەرەوە.

چیرۆکی سەرەکی: بەهۆی گەمارۆی تووند و داخستنی تەواوەتیی سنوورەکانی غەززە لەلایەن سوپای ئیسرائیلەوە لە کۆی 36 نەخۆشخانەی کەرتەکە تەنیا 17 نەخۆشخانەیان بەشێوەیەکی ڕێژەیی و ناتەواویی کاردەکەن، هاوکات لە باکووری کەرتی غەززە و لە ناوچەکانی باشووریش هیچ نەخۆشخانەیەک کار ناکات و هەموویان بە بۆردوومانی ئیسرائیل وێران بوون.

لێدوانی فەرمی: ئەحمەد ئەلفەرا، بەرپرسی گواستنەوەی بریندار و نەخۆش لە وەزارەتی تەندروستی لە کەرتی غەززە ڕایگەیاند: 14 هەزار بریندار و نەخۆش لە لیستی گەشتەکاندا تۆمارکراون بۆ چارەسەرکردن لە دەرەوەی وڵات و ژیانیان پەیوەستە بە کردنەوەی دەروازە سنوورییەکان لەلایەن ئیسرائیلەوە، تاوەکو ئێستا 546 کەس لە چاوەڕوانیی گەشتکردن گیانیان لەدەستداوە.

زانیاریی زیاتر: بە وتەی ئەحمەد ئەلفەرا، توشبووانی نەخۆشیی گورچیلە زەرەرمەندترین کەسن بەهۆی ڕێگریی ئیسرائیل لە قەدەغەکردنی گەشت و نەبوونی خزمەتگوزاریی پزیشکی کە لە سەرەتای جەنگەوە لە هەزار و 150 نەخۆشی گورچیلە زیاتر لە 40%ـی نەخۆشەکان گیانیان لەدەستداوە.