یەکشەممەی داهاتوو پشووی فەرمییە

ئاڤا نیوز

بەپێی بڕیارێکی ئەمینداریێتی گشتیی ئەنجوومەنی وەزیرانی عێراق، ڕۆژی یەکشەممەی داهاتوو لەسەرجەم دامودەزگاکانی حکومەت پشوی فەرمی ده‌بێت.
 
وێنە گەورەکە: ڕۆژی عاشوورا دەکەوێتە دەیەمین ڕۆژی مانگی موحەڕەم، لەنێو موسڵمانی شیعە مەزهەبدا پیرۆز و گرنگییەکی زۆری هەیە و تێیدا ماتەم دەگێڕن، چونکە لەو ڕۆژەدا ئیمامی حوسێن لە کەربەلا شەهید کراوە.

ڕاگەیێنراوی فەرمی: لەڕاگەیێنراوێکدا ئەمینداریێتی گشتیی ئەنجوومەنی وەزیرانی عێراق بڵاویکردەوە: بەپێی بڕگەکانی مادەی یەکەم/ج لە یاسای پشووە فەرمییەکانی ژمارە 12ـی ساڵی 2024، ئەنجوومەنی وەزیرانی عێراق بە بۆنەی ساڵیادی شەهیدبوونی ئیمام حوسێن لەسەرجەم فەرمانگە و دامودەزگاکانی حکومەت پشووی فەرمییە و دەوامی فەرمانبەران ڕادەگیرێت.

چی ڕوودەدات:  ساڵانە لە سەرەتای مانگی موحەڕەم و ڕێوڕەسمەکانی عاشوورا، سەدان هەزار کەس لە شیعەمەزهەبەکانی عێراق و زیارەتكارانی بیانی سەردانی مەزارگەی ئیمام حوسێن لە کەربەلا دەکەن و بەشێکی زۆری ڕێگە و بانەکان لەپارێزگاکانی ناوەڕاست و باشووری عێراق دادەخرێن.