ئاسایشی هەولێر سێ تەقەكەری قەزای خەبات دەستگیر دەكات

ئاڤا نیوز

لەسەر شەڕە تەقەكەی شەوی ڕابردووی قەزای خەبات، ئاسایشی هەولێر سێ تۆمەتبار دەستگیر دەكات.

 

چیرۆكی سەرەكی: لەسەر كێشەی زەوی و زار و دیاریكردنی سنووری زەویی كشتوكاڵی، شەوی ڕابردوو شەڕ و دەمەقاڵێ لەنێوان دانیشتوانی دوو گوندی سنووری قەزای خەبات دروست دەبێت، بەشێكیان پەنا بۆ بەكارهێنانی چەك دەبەن و دەبێتە شەڕە تەقە.

 

ڕاگەیێنراوی فەرمی: بەڕێوەبەرایەتیی ئاسایشی هەولێر ئەمڕۆ هەینی 4ـی تەمموزی 2025، ڕاگەیێنراوێكی بڵاوكردەوە و تێیدا ئاماژەی بەوە كردووە، لەسەر تەقەكردن و نانەوەی ئاژاوە، بەفەرمانی دادوەری لێكۆڵینەوەی ئاسایشی هەولێر، سێ تۆمەتباریان دەستگیر كردووە و پەڕاوی لێكۆڵینەوەیان بۆ كراوەتەوە.

 

زانیاریی زیاتر: بەگوێرەی ڕاگەیێنراوەكەی ئاسایشی هەولێر، شەڕە تەقەكە لەسەر كێشەی زەوی و زار و دیاریكردنی سنووری دوو گوندی دەڤەری خەبات ڕوویداوە.