کۆبوونەوەی شاندی دەم پارتی لەگەڵ ئەردۆغان کۆتاییهات

ئاڤا نیوز

دوای ئەوەی ڕۆژی یەکشەممە بۆ ماوەی دوو کاژمێر و 30 خولەک لەگەڵ عەبدوڵڵا ئۆجەلان کۆبوونەوە، شاندی دەم پارتی ئەمڕۆ دووشەممە لەبارەی کارەکانی پڕۆسەی ئاشتی لەگەڵ سەرۆککۆماری تورکیا کۆبوونەوە. 

زانیاریی بەدەستهاتوو: ڕەجەب تەیب ئەردۆغان، سەرۆککۆماری تورکیا دوای چوار مانگ و بۆ دووەم جار، پێشوازی لە پەروین بوڵدان و متحەت سنجار لە شاندی دەم پارتی کرد، ئەمەش دوای ئەوەی هەر ئەو شاندە دوێنی سەردانی ئیمرالیان کرد و لەگەڵ عەبدوڵڵا ئۆجەلان، ڕێبەری زیندانیکراوی پەکەکە بۆ ماوەی دوو کاتژمێر و نیو کۆبوونەوە.

لە کۆبوونەوەکەدا ئیبراهیم کاڵن، سەرۆکی دەزگای هەواڵگریی تورکیا و ئەفکا ئەلا، سەرۆکی فراکسیۆنی ئاکپارتی بەشداربوون. 

لێدوانی فەرمی: محەممەد کەماچ، پەرلەمانتاری دەم پارتی بە ئاڤای ڕاگەیاند، لە کۆبوونەوەکە دا باس لە یەکەم مەراسیمی چەک دانانی پەکەکە لە هەرێمی کوردستان کرا و دواتر باس لە هەنگاوەکانی پڕۆسەی ئاشتی کراوە. 

باکگراوند: یەکەم کۆبوونەوەی نێوان سەرۆککۆماری تورکیا و شاندی ئیمرالی لە 10ی نیسان ئەنجام درا، ئەوکاتە هەر یەکە لە سڕی سوورەیا ئۆندەری کۆچکردوو لەگەڵ پەروین بوڵدان ئامادەی کۆبوونەوەکە بوون.