گوندی دۆڵاو لە هەورامان خەریكە بە تەواوی چۆڵ دەبێت

ئاڤا نیوز

ئاڤا میدیا دەچێتە گوندی دۆڵاو لە ناوچەی هەورامانی ژاوەڕۆ لە ڕۆژهەڵاتی كوردستان و باس لە پشتخوێخستنی گوندەكە و كۆچكردنی دانیشتووانەكەی دەكات.

وێنە گەورەكە: گوندی دۆڵاو كە بە دۆڵی ئاوەكان و داڵانە زۆر و زەوەندەكانی بەنێوبانگە و 40 لە شاری سنەی ڕۆژهەڵاتی كوردستان دوورە، بە هۆی پشتگوێخستنی و نەبوونی خزمەتگوزارییەوە ئێستا زۆرینەی دانیشتوانەكەی  ڕوویان کردووەتە شارەكانی سنە و مەریوان و كامیاران و جوانڕۆ.

زانیاریی بەدەستهاتوو: بەپێی زانیارییەكانی ئاڤا میدیا، گوندی دۆڵاو نزیکەی 20 ماڵێکی تێدا ماوەتەوە و ئەوانیش چوونەتە ناو باخەکانیان لەناو گوندا نەماون.

زانیاریی زیاتر: جاران زیاتر لە 500 منداڵ هەر لە قۆناغی بنەڕەتیی دۆڵاو دەیانخوێند، كەچی ئێستا قوتابخانەكەش لە بێ منداڵی داخراوە.

هۆكارە زانراوەكان: بەپێی گوتەی خەڵكی گوندەكە و بەدواداچوونی ئاڤا میدیا، هۆكاری كۆچكردنی خەڵكی گوندی دۆڵاو دەگەڕێتەوە بۆ نەبوونی خزمەتگوزاری بە گشتی و بەتایبەت نەبوونی ڕێگایەكی شیاو و سەختیی ڕێگاكە.

ئەوەی پێویستە بیزانیت: دۆڵاو بە یەكێك لە ناوچە فێنكەكانی هەورامان هەژمار دەكرێت نزیکەی 160 کانی تێدایە، لانكەی مەرقەدی شێخ هادی، شێخی گەورەی تەریقەی قادرییە کە بە تەکیەی دۆڵاو بەناوبانگە و ساڵانە گەشتیارێکی زۆری ئایینی ڕووی تێدەكرد و مێژووەكەی بۆ 270 ساڵ لەمەوپێش دەگەڕێتەوە.

ئەمەش بزانە: گوندی دۆڵاو بە گێلاس و ترێ زۆر بەنێوبانگە و گێلاس و ترێكەی خواستی زۆری كڕیارانی لە ڕۆژهەڵاتی كوردستان لەسەرە.