لە شارەوانییەکانی دەرەوەی سەنتەری شاری هەولێر دەست بە دابەشکردنی زەوی دەکرێت

ئاڤانیوز

بڕیارە هەفتەی داهاتوو لە سنووری بەڕێوەبەری گشتیی شارەوانییەکانی هەولێر دەست بە دابەشکردنی زەوی بەسەر فەرمانبەراندا بکرێت.

وێنە گەورەکە: بەڕێوەبەرایەتیی گشتیی شارەوانییەکانی هەولێر کە 37 سەرۆکایەتی شارەوانی قەزا و ناحیەکانی سنووری پارێزگای هەولێر لە خۆدەگرێت، ڕێکار و ئامادەکارییەکان بۆ دابەش کردنی زەوی بەسەر فەرمانبەران لە سنووری زۆربەی ئەو شارەوانەیانە تەواو کراون.

لێدوانی فەرمی: مەریوان حاکم هادی، بەڕێوەبەری گشتیی شارەوانییەکانی هەولێر بە ئاڤامیدیای گوت، هەفتەی داهاتوو دەست بە تیروپشک دەکەین بۆ دابەشکردنی زەوی بەسەر فەرمانبەران، بۆ ئەم مەبەستە  لە سنووری بەڕێوەبەرایەتیی گشتیی شارەوانییەکانی هەولێر 18 نەخشەی کەرتی پەسەند کراون کە 34 هەزار پارچە زەوییان لەخۆگرتووە.

زانیاریی زیاتر: بەگوتەی مەریوان حاکم هادی، لە ماوەی کەمتر لە دوو مانگی داهاتوو نزیکەی هەشت هەزار پارچە زەوی دیکە ئامادە دەکرێن، بۆ ئەوەی سەرجەم ئەو فەرمانبەرانەی لەو سنوورە شایستەن و مەرج و پێوەرکانی پێدانی زەوی دەیانگرێتەوە پارچەیەک زەوییان پێبدرێت.