ئاگرین عەبدوڵڵا: كابینەی نۆیەم 718 پرۆژەی ڕێگاوبانی جێبەجێكردووە

ئاڤا نیوز

بریكاری وەزارەتی ئاوەدانكردنەوە و نیشتەجێكردن ڕایدەگەیەنێت، لە شەش ساڵی تەمەنی كابینەی نۆیەمی حكومەتی هەرێمی كوردستان، 718 پرۆژەی ڕێگاوبان جێبەجێ كراون و لە ئاییندەش پرۆژەی گرنگتری ئەو سێكتەرە جێبەجێ دەكرێن.

چیرۆكی سەرەكی: لە چوارچێوەی هەوڵەكانی حكومەتی هەرێمی كوردستان بۆ گەشەپێدانی تۆڕی ڕێگاوبان، لە شەش ساڵی تەمەنی كابینەی نۆیەمدا بایەخێكی تایبەت بە پەرەپێدانی ڕێگاوبان و نەهێشتنی كەموكوڕییەكانی ئەو سێكتەرە، دراوە.

لێدوانی فەرمی: د. ئاگرین عەبدوڵڵا، بریكاری وەزارەتی ئاوەدانكردنەوە و نیشتەجێكردنی حكومەتی هەرێمی كوردستان بە ئاڤای ڕاگەیاند، سەرجەمی پرۆژەكانی ڕێگاوبان بە گوژمەی تریلیۆنێك و 32 ملیار و 748 ملیۆن دینار جێبەجێكراون، بەهۆیەوە دووهەزار و 681 كیلۆمەتر ڕێگای قیرتاوكراوی نوێ یاخود ڕێگای كۆنی نۆژەنكراوە، خراوەتە خزمەتی هاووڵاتیان.

بریكاری وەزارەتی ئاوەدانكردنەوە و نیشتەجێكردن ئاماژەی بەوەشكرد، زۆر پرۆژەی دیكەی گرنگتریش لە بواری ڕێگاوبان لە ئاییندە جێبەجێ دەكرێن.

بۆچی گرنگە: باشتركردنی ژێرخانی ڕێگاوبان، ڕۆڵی دەبێت لە بەرەوپێشبردنی جووڵەی بازرگانی و ڕاكێشانی ڕێژەیەكی زۆرتری گەشتیاران و سنوورداركردنی ڕووداوەكانی هاتووچۆ، هەموو ئەوانەش سوودی دەبێت بۆ بووژاندنەوەی ئابووریی كوردستان.