ئەنجوومەنی باڵای فەتوای کوردستان فەتوا لەبارەی شوقە و خانوو و خوێندن دەردەکات

ئاڤا نیوز

ئەنجوومەنی باڵای فەتوا لە کوردستان لەبارەی کڕین و فرۆشتن بەو شوقە و خانوانەی کە هێشتا تەواو نەکراون و تەنها لەسەر نەخشەن، فەتوای دەرکرد و بە کارێکی ناشەرعی و حەرام ناوی برد، هاوکات فەتوای لەسەر بابەتی نووسینی نامەی ماستەر و تێزی دکتۆرا و بەکرێ دانی بڕوانامەش دەرکرد.

چیرۆکی سەرەکی: ئەمڕۆ شەممە، ئەنجوومەنی باڵای فەتوا لە کوردستان لەسەر دوو بابەت کۆبووەوە و فەتوای دەرکرد، یەکێکیان لەبارەی فرۆشتنی ئەو شوقە و خانوانەیە کە هێشتا تەواو نەکراون، ئەوەی دیکەیان تایبەتە بە نوسینی ماستەر و دکتۆرا بە پارە و بەکرێ دانی بڕوانامە.

لێدوانی فەرمی: د. حەسەن محەممەد، ئەندامی ئەنجومەنی باڵای فەتوا بە ئاڤای ڕاگەیاند، ئەم ماوەیە پرسیاری زۆرمان لەبارەی فرۆشتنەوەی ئەو شوقە و خانوانە کە لە پڕۆژە نوێیەکان هەن و هێشتا تەواو نەکراون لێ دەکرێت، ئێستا خەڵکێکی زۆر ڕووبەڕووی گرفت بووەتەوە. بۆیە لیژنەکە فەتوای دا، ئەگەر شوقە و خانوو  بە هەیکەل بوو ئاساییە و دروستە بە شێوازی دەست لەسەر هەڵگرتن بفرۆشرێت.

واتا ئەو کەسەی خاوەنیەتی کە دەیفرۆشێ بڵێ ئەمە حاڵ و وەزعی خانوو یان شوقەکەیە، لەم بارە ئاساییە و کێشەی نییە، بەڵام ئەو شوقە و خانوانەی کە تەنیا لەسەر نەخشە بوونیان هەیە، لە کاتێکدا دروستە بیانکڕی کە هەموو بەڵگەنامەیەکی دیار بێت، واتا لە دەستی یەکەم بێت ئاساییە لە کۆمپانیا، بەڵام بەر لە دروستکردن و تەواو بوونی دروست نییە ئەم یەکەیە بفرۆشرێتەوە، ئەمە کارێکی حەرامە.

لەلایەکی دیکەوە: هەر ئەمڕۆ لیژنەی فەتوا لەبارەی نووسینی ماستەر و دکتۆرا بە پارە و بەکرێدانی بڕوانامە فەتوای داوە، لیژنەی فەتوا دەڵێن؛ ئەگەر کارەکە تەنیا دیزاین یان تایپکردن و ڕێکخستنی ناوەوەی ماستەرنامە و تێزی دکتۆرا بوو، یان پێدانی سەرچاوەی زانستی بوو، ئەوا هیچ کێشەی نییە و دروستە، بەڵام ئەگەر بابەتەکە بوو بە نووسینی زانستی نامە یان تێزەکە، کارێکی ناشەرعیە و دەچێتە خانەی غەشکردن.

ئەوانەشی بڕوانامەکەیان بەکرێ دەدەن بۆ کردنەوەی زانکۆی تایبەت، لەلایەن لیژنەی فەتواوە ئاگادار دەکرێنەوە کە ئەمە کارێکی دروست نییە، چونکە ئەو کەسەی بڕوانامەکە بەکرێ دەدات دەوام ناکات، جگە لەوە ڕەنگە بەهۆی بەکرێ دانی ئەو بڕوانامەیە زانکۆیەکی ئاست نزم دابمەزرێت، ئەمەش کارێکی ناشەرعییە.