سەرۆك بارزانی پیرۆزبایی لە هەردوو یانەی دهۆك و زاخۆ دەكات

ئاڤا نیوز

سەرۆك بارزانی پیرۆزبایی لە هەردوو یانەی دهۆك و زاخۆ دەكات بەبۆنەی سەركەوتنی مێژوویی هەردوو یانە و گەیشتنیان بە یاری كۆتایی جامی عێراق.

چیرۆكی سەرەكی: شەوی ڕابردوو، هەردوو تیپی تۆپی پێی زاخۆ و دهۆك مێژوویان تۆماركرد، كاتێك لە یاری پێش كۆتایی جامی عێراق لە یانەكانی شورتە و قوەجەوییە 'دوو یانە جەماوەرییەكەی شاری بەغدا'ـیان بردەوە و خۆیان گەیاندە یاریی كۆتایی جامی عێراق.

بڵاوکراوەی فەرمی: د. عەلی تەتەر، پارێزگاری دهۆك ڕایگەیاند، سەرۆك بارزانی بەڕێگەی تەلەفۆن پیرۆزبایی لە كارگێڕی، ڕاهێنەران، یاریزانان، جەماوەر و هاندەرانی هەردوو یانەی دهۆك و زاخۆ كرد و خۆشحاڵی خۆی بۆ ئەو سەركەوتنە مێژووییە دەربڕی كە هەردوو یانەكەی هەرێمی كوردستان تۆماریان كرد.

لەلایەکی دیکەوە: هەر بە مەبەستی پیرۆزبایی ئەو سەرکەوتنە مێژووییە، سەرۆک بارزانی پەیوەندیی تەلەفۆنی لەگەڵ گۆهدار شێخۆ،  سەرپەرشتیاری ئیدارەی زاخۆ کردووە.

ئەوەی پێویستە بیزانیت: هەردوو یانەکەی بادینان، ڕۆژی چوارشەممەی داهاتوو لە بەغدا لە یاریی کۆتایی جامی عێراق بەیەکدەگەن، ئەمەش جاری یەكەمە لەمێژووی 50 ساڵەی پاڵەوانێتییەکە دوو یانەی کوردی بگەنە یاری کۆتایی.