شەرع هۆشداری دەداتە ئیسرائیل: سەرکەوتن لە گۆڕەپانێکدا سەرکەوتن لە گۆڕەپانێکی دیکە مسۆگەر ناکات

ئاڤا نیوز

سەرۆککۆماری سووریا، لە وتارێکدا کە بەرەبەیانی ئەمڕۆ پێنجشەممە پێشکەشی کرد، ئیسرائیلی بە "نانەوەی ئاژاوە لەناو سووریادا" تۆمەتبار کرد و وتی "بەهۆی ڕەفتارەکانییەوە بووەتە هۆی ئاڵۆزبوونی دۆخەکە (لە پارێزگای سوەیدا)."

وێنە گەورەکە: دوای چوار ڕۆژ لە شەڕ و پێکدادانانی نێوان هێزەکانی سووریا و دروزەکان، دواجار ئاگربەست ڕاگەیێنرا، بەگوێرەی نوێترین ئاماری ڕوانگەی سووری بۆ مافەكانی مرۆڤ، سەرووی 300 كەس كوژراون، كە نزیكەی 100 لە كوژراوان سەربازن.

پەیامی فەرمی: ئەحمەد شەرع سەرۆککۆماری سووریا وتی: "کەوتووینەتە بەردەم دوو بژاردە، یان ڕووبەڕووبوونەوەی ئیسرائیل یان چاککردنی بەرەی ناوخۆمان"، وتیشی: "بە یەکڕیزی ڕووبەڕووی هەوڵەکانی دروستکردنی ئاژاوە دەبینەوە، سووریا نابێتە شوێنێک بۆ دروستکردنی ئاژاوە، ڕێگە نادەین سووریا ڕابکێشرێتە ناو شەڕێکی نوێوە".

سەرۆککۆماری سووریا جەختی لەسەر ڕەتکردنەوەی "هەر هەوڵێک بۆ دابەشکردنی سووریا" کردەوە و دووپاتیکردەوە کە "درووزەکان بەشێکن لە پێکهاتەی نیشتمان و پاراستنیان لە ئەولەوییەتدایە،" و ئاماژەی بە "سپاردنی بەرپرسیارێتیی پاراستنی ئاسایش لە سوەیدا بە گرووپە خۆجێیەکان و شێخە تێگەیشتووەکان" کرد.

زانیاریی زیاتر: شەرع لە وتارەکەیدا وتیشی: "گەلەکەمان لە شۆڕشێکدا بۆ بەدەستهێنانی ئازادی ڕاپەڕی و تێیدا سەرکەوت و قوربانیی گەورەی دا، هێشتا ئەم گەلە ئامادەیە بۆ شەڕکردن لەپێناو کەرامەتیدا ئەگەر هەر هەڕەشەیەکی لێبکرێت." هەروەها وتی: "قەوارەی ئیسرائیل، کە هەمیشە ڕای هێناوین لەسەر بەئامانجگرتنی سەقامگیریمان و نانەوەی ئاژاوە لەنێوانماندا لەدوای ڕووخانی ڕژێمی پێشوو، ئێستاش دووبارە هەوڵدەدات خاکە پاکەکەمان بکاتە گۆڕەپانی ئاژاوەیەکی بێکۆتا، کە لە ڕێگەیەوە دەیەوێت یەکڕیزیی گەلەکەمان هەڵبوەشێنێتەوە و تواناکانمان بۆ بەردەوامبوون لە پرۆسەی ئاوەدانکردنەوە و هەستانەوە لاواز بکات."

سەرۆکی سووریا وای پۆلێنکرد کە "ئەم قەوارەیە دەستبەرداری بەکارهێنانی هەموو شێوازێک نابێت بۆ چاندنی ناکۆکی و ململانێ، بێئاگا ماوەتەوە لەو ڕاستییەی کە سوورییەکان، بە مێژووە درێژەکەیانەوە، هەموو جۆرە جیابوونەوە و دابەشبوونێکیان ڕەتکردووەتەوە." ئەو وای بینی کە "خاوەنبوون بە هێزێکی گەورە مەرج نییە مانای بەدەستهێنانی سەرکەوتن بێت، هەروەک چۆن سەرکەوتن لە گۆڕەپانێکی دیاریکراودا سەرکەوتن لە گۆڕەپانێکی دیکە مسۆگەر ناکات، ڕەنگە بتوانیت شەڕێک دەستپێبکەیت، بەڵام ئاسان نییە کۆنترۆڵی ئەنجامەکانی بکەیت، چونکە ئێمە کوڕانی ئەم خاکەین و بەتواناترین لە تێپەڕاندنی هەموو هەوڵەکانی قەوارەی ئیسرائیل بۆ پەرتەوازەکردنمان و لەوە پتەوترین کە ئاژاوەی دروستکراو ورەمان بڕووخێنێت."

وتیشی: "ئێمەی کوڕانی سووریا باش دەزانین کێ هەوڵی ڕاکێشانمان دەدات بۆ ناو شەڕ و کێ هەوڵی دابەشکردنمان دەدات، ئەو دەرفەتەیان پێنادەین کە گەلەکەمان تێوەبگلێنن لە شەڕێکدا کە دەیانەوێت لەسەر خاکی ئێمە هەڵیگیرسێنن، شەڕێک کە هیچ ئامانجێکی نییە جگە لە پەرتەوازەکردنی نیشتمانمان و پەرشکردنی هەوڵەکانمان بەرەو ئاژاوە و وێرانکاری، چونکە سووریا گۆڕەپانی تاقیکردنەوەی پیلانگێڕییە دەرەکییەکان نییە و شوێنێکیش نییە بۆ جێبەجێکردنی چاوتێبڕینی ئەوانی تر لەسەر حیسابی خوێنی منداڵ و ژنەکانمان."

شەرع جەختی کردەوە کە "دەوڵەتی سووریا دەوڵەتی هەمووانە و کەرامەت و سەربەرزیی نیشتمانە و خەونی هەموو سوورییەکە کە ببینێت نیشتمانەکەی خۆی لە ڕێگەی ئەم دەوڵەتەوە ئاوەدان دەکاتەوە، هەموومان بێ جیاوازی یەکدەگرین بۆ ئەوەی شکۆ بۆ سووریا بگەڕێنینەوە و بیخەینە ڕیزی پێشەوەی ئەو گەلانەی کە لە ئاسایش و سەقامگیریدا دەژین."

ئەو وای بینی کە "ئاوەدانکردنەوەی سووریایەکی نوێ پێویستی بەوەیە هەموومان لە دەوری دەوڵەتەکەمان کۆ ببینەوە و پابەندی بنەماکانی بین و بەرژەوەندیی نیشتمان بخەینە سەرووی هەموو بەرژەوەندییەکی تاکەکەسی یان سنووردارەوە، ئەوەی ئەمڕۆ پێویستمانە ئەوەیە کە هەموومان هاوبەش بین لەم ئاوەدانکردنەوەیەدا و شانبەشانی یەک کاربکەین بۆ تێپەڕاندنی هەموو ئەو ئاڵنگارییانەی ڕووبەڕوومان دەبنەوە." وتیشی: "یەکڕیزی چەکمانە و کاری جیددی ڕێگامانە، ئیرادەی پۆڵاینمان ئەو بنەمایەیە کە ئەم داهاتووە گەشەی لەسەر بوونیاد دەنێین."

سەرۆکی سووریا وتیشی: "هەروەها لەم وتارەمدا، بە تایبەتی ئاماژە بە خوشک و برا درووزەکانمان دەکەم کە بەشێکی ڕەسەنی ئەم نیشتمانەن، سووریا هەرگیز نابێتە شوێنی دابەشکردن و پەرتەوازەکردن یان نانەوەی ئاژاوە لەنێوان کوڕانیدا، دڵنیاتان دەکەینەوە کە پاراستنی ماف و ئازادییەکانتان لە ئەولەوییەتەکانماندایە، ئێمە هەر هەوڵێک ڕەتدەکەینەوە کە ئامانجی ڕاکێشانی ئێوە بێت بۆ لایەنێکی دەرەکی یان دروستکردنی دووبەرەکی لەناو ڕیزەکانماندا،  هەموومان هاوبەشین لەم خاکەدا و ڕێگە نادەین هیچ لایەنێک ئەم وێنە جوانەی سووریا و فرەڕەنگییەکەی بشێوێنێت."

لە کۆتاییدا وتی: "دەوڵەتی سووریا بە هەموو دامەزراوە و سەرکردەکانییەوە، بە هەموو ئیرادە و سووربوونێکەوە، دەستوەردانی کرد بۆ ڕاگرتنی ئەو شەڕە ناوخۆیییەی کە لە سوەیدا لەنێوان گرووپە چەکدارەکانی سوەیدا و دەوروبەریدا بەهۆی کێشەی کۆنەوە ڕوویدا، لەبری یارمەتیدانی دەوڵەت بۆ هێورکردنەوەی دۆخەکە، چەند گرووپێکی لە یاسا دەرچوو دەرکەوتن کە ڕاهاتبوون لەسەر ئاژاوە و دەستێوەردان و نانەوەی ئاژاوە، سەرکردەی ئەم چەتانە هەر هەمان ئەو کەسانەن کە بۆ چەندین مانگ دیالۆگیان ڕەتکردەوە و بەرژەوەندییە کەسییە تەسکەکانیان خستە سەرووی بەرژەوەندیی نیشتمانەوە."