ناوخۆی عێراق: هێرش نەکراوەتە سەر تیمەکانی بەرگریی شارستانی عێراق لە سووریا

ئاڤا نیوز

وەزارەتی ناوخۆی عێراق، هێرشکردنە سەر تیمەکانی بەرگریی شارستانی عێراق لە سووریا ڕەتدەکاتەوە و دەڵێت" تیمەکانمان بەبێ کێشە گەڕاونەتەوە دوای ئەوەی لە ئۆپەراسیۆنی کوژاندنەوەی ئاگرەکانی سووریادا بەشداریان کرد".

 

چیرۆکی سەرەکی: بەشێک لە میدیا و تۆڕە کۆمەڵایەتییەکان بڵاویانکردووەتەوە، تیمەکانی بەرگریی شارستانیی عێراق لەکاتی بەشداریکردنیان لە ئۆپەراسیۆنەکانی کوژاندنەوەی ئاگرەکەی کەناراوەکانی سووریا، ڕووبەڕووی هێرشێکی تیرۆریستیی تووند بوونەتەوە و ژمارەیەک لە ئەندامانیان برینداربوونە و ڕەوانەی  نەخۆشخانەکانی لازقییە  کراون.

لێدوانی فەرمی: میقداد میری، بەڕێوەبەری گشتیی پەیوەندییەکان و ڕاگەیاندن لە وەزارەتی ناوخۆی عێراق ڕایگەیاند: تیمەکانی بەرگریی شارستانی عێراق ئەرکە مرۆییەکانیان بە سەرکەوتوویی ئەنجامداوە و گەڕاونەتەوە بۆ نیشتمان، بەبێ ئەوەی ڕووبەڕووی هیچ ڕووداوێکی ئەمنیی ببنەوە.

زانیاریی زیاتر: میری ئاماژەی بەوەشکرد، هەموو ئەو دەنگۆیانەی باس لە هێرشی تیرۆرستی بۆ سەر تیمەکانی ئاگرکوژێنەوەی عێراق دەکەن لە سووریا دوورن لە ڕاستییەوە و وەزارەتی ناوخۆی عێراق ڕەتیدەکاتەوە، بەپێچەانەوە بەشدارییەکەیان سەرکەوتوو بووە و جێگەی پێزانینی لایەنە فەرمییەکانی سووریا بووە.