ڕوانگەیەکی ئابووری: عێراق نیوەی پێداویستیی خۆی لە کارەبا بەرهەم دەهێنێت

ئاڤا نیوز

ڕوانگەیەکی ئابووریی ڕایدەگەیێنێت، بەرهەمهێنانی وزەی کارەبا لە عێراق تەواوی پێداویستییەکانی وڵات دابین ناکات و ئێستا نیوەی ئەو کارەبایە بەرهەم دەهێنێت کە پێویستیەتی کە دەگاتە نزیکەی 55 هەزار مێگاوات.

 

وێنە گەورەکە: سەرەڕای ئەو بودجە زەبەلاحەی لە ماوەی 22 ساڵی ڕابردوو بۆ کەرتی کارەبا لە عێراق تەرخانکراوە، بەڵام تاوەکو ئێستا نەتوانراوە نیوەی ئەو بڕە کارەبایە بەرهەم بهێنرێت کە وڵاتەکە پێویستیەتی.

 

ڕاگەیێنراوی فەرمی: بەگوێرەی ڕوانگەی "ئیکۆ عێراق"، " ئەو کارەبایەی ئێستا لە عێراق بەرهەمدەهێنرێت لە 28 هەزار مێگاوات تێپەڕ ناکات، لە کاتێکدا پێویستی عێراق بە کارەبا لەنێوان 50 بۆ 55 هەزار مێگاواتدایە، بۆ دابینکردنی تەواوی خواست بەتایبەتی لە وەرزی هاویندا.

 

هۆکارە زانراوەکان: ڕوانگەکە هۆکاری ئەم کورتھێنانەی گەڕاندەوە بۆ "چەند هۆکارێک، کە دیارترینیان کەمیی بەردەوامی هاوردەی گازی ئێرانە،" یەکێکی دیکەش لە گرفتەکان: "کێشە لە چاککردنەوەی وێستگەکان و خراپیی تۆڕەکانی گواستنەوە و دابەشکردندا هەیە، کە دەبێتە هۆی بەفیڕۆدانی نزیکەی 30%ی وزەی بەرهەمهێنراو."

 

چارەسەرەکان: بەگوێرەی ڕوانگەکە چارەسەرکردنی قەیرانی کارەبا لە وڵاتدا بە سێ قۆناغدا تێدەپەڕێت: یەکەمیان، بەردەوامبوون لە هاوردەکردنی گازی ئێران، لەپاڵ کڕینی کارەبای ئامادەکراو لە وڵاتانی دراوسێ بۆ قەرەبووکردنەوەی کورتھێنانەکە، بەکرێگرتنی وێستگەی سەرئاوکەوتوو بۆ گازی شلکراوە (LNG) لە قەتەر یان عومان بۆ کارپێکردنی ئەو وێستگانەی لەکارکەوتوون.

 

- قۆناغی دووەم، کە مامناوەندە، ڕێککەوتن لەگەڵ کۆمپانیا گەورەکان لەخۆدەگرێت بۆ دروستکردنی وێستگەی نوێ کە بە سووڕی تێکەڵ کاردەکەن بۆ بەدەستهێنانی کاراییەکی بەرزتر بە بەکاربردنی گازی کەمتر، سەرباری هەمەجۆرکردنی سەرچاوەکانی وزە لەڕێگەی دروستکردنی پڕۆژەکانی وزەی خۆرەوە.

 

- قۆناغی کۆتایی پێویستی بە وەبەرهێنانە لەو گازەی هاوەڵی کێڵگە نەوتییەکانە لەبری سووتاندنی، سەرباری فراوانکردنی پڕۆژەکانی بەستنەوەی کارەبایی لەگەڵ وڵاتانی کەنداو، ئوردن، تورکیا و ئێران. جەختیشی کردەوە کە "پێویستە هەموو ئەم قۆناغانە هاوشان بن لەگەڵ چاکسازییەکی گشتگیر لە تۆڕەکانی گواستنەوە و دابەشکردندا بە ئامانجی کەمکردنەوەی بەفیڕۆچوونی کارەبا."