کۆمیسیۆن: تا ئێستا 46 کاندید لە بەشداریکردن لە هەڵبژاردن دوورخراونەتەوە

ئاڤا نیوز

کۆمیسیۆنی باڵای سەربەخۆی هەڵبژاردنەکان ڕایدەگەێنێت، تا ئێستا 46 کاندید لە پرۆسەی هەڵبژاردن دوورخراونەتەوە.

 

وێنە گەورەکە: بڕیارە 11 تشرینی دووەمی ئەمساڵ هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت، کۆمیسیۆنی باڵای سەربەخۆی هەڵبژاردنەکانیش بەردەوامە لە ڕێکارەکانی بۆ بەڕێوەبردنی پرۆسەکە.

 

لێدوانی فەرمی: عیماد جەمیل، بەرپرسی تیمی ڕاگەیاندنی کۆمیسیۆن بە ئاژانسی هەواڵی عێراقی ڕاگەیاند، "پرۆسەی وردبینیی کاندیدەکان تا کۆتایی مانگی تەمموز بەردەوام دەبێت"، ئاماژەی بەوەشکرد، "تا ئێستا 46 کاندید دوورخراونەتەوە، بەهۆی ئەوەی حیزبەکانیان مەرجەکانی وەرگرتنی کاندیدەکانیان لەنێو لیستی هەڵبژاردن لەدەست داوە، هۆکارێکی دیکەش تەواونەکردنی پێداویستییەکانی خۆپاڵاوتنە."

 

لە هەمان کاتدا: عیماد جەمیل ڕایگەیاند، "بەپێی پەیڕەوی تۆمارکردنی کاندیدەکان ژمارە 3ـی ساڵی 2005، لە لیستی کراوەدا نابێت ڕێژەی هەڵگرانی بڕوانامەی دبلۆم و ئامادەیی لە 20% زیاتر بێت، بۆیە دەرکەوتووە کە 11 کاندید کە هەڵگری بڕوانامەی ئامادەیی بوون، ئەو ڕێژەیەیان تێپەڕاندووە و بە هەڵگرانی بڕوانامەی بەکالۆریۆس جێگەیان گیراوەتەوە."

 

لەلایەکی دیکەوە: سەبارەت بە ڕێژەی ژنانیش، بەرپرسی تیمی ڕاگەیاندنی کۆمیسیۆن گوتی، پێویستە لەنێو لیستە کراوەکاندا ژنان ڕێژەی 25% پێکبهێنن، هەر بۆیە سێ کاندیدی پیاویش گۆڕدراون (بۆ پڕکردنەوەی ڕێژەکە)."