خشتەی تاقیکردنەوەکانی خولی دووەمی پۆلی 12ـی ئامادەیی بڵاو کرایەوە

ئاڤا نیوز

وەزارەتی پەروەردەی حکومەتی هەرێمی کوردستان خشتەی خولی دووەمی تاقیکردنەوەکانی پۆلی 12ـی ئامادەیی (زانستی، وێژەیی و پیشەیی) بڵاوکردەوە. لە 2025-08-23 دەستپێدەکات و ڕۆژی 2025-09-08 کۆتایی پێ دێت.

لێدوانی فەرمی: د. سەیوان سەعید، بریکاری وەزارەتی پەروەردەی حکومەتی هەرێمی کوردستان بە ئاڤا میدیای ڕاگەیاند، خشتەی خولی دووەمی تاقیکردنەوەکانی ساڵی خوێندنی 2024- 2025 بۆ هەموو پەروەردەکان نێردراوە. تاقیکردنەوەکان بۆ قوتابخانە حکومی و ناحکومییە خۆماڵییەکانە، بە هەمان میکانیزمی خولی یەکەم تاقیکردنەوەکان کاتژمێر 7:30 خولەک دەستپێدەکەن.

ژمارەکان وادەڵێن: لە خولی دووەم 96 هەزار و 572 قوتابی لە بەشەکانی زانستی، وێژەیی و پیشەیی تاقیکردنەوە دەکەن، ئەمە لە کاتێکدایە لە خولی یەکەم تەنیا 19 هەزار و 215 قوتابی دەرچوو بوون کە بەم شێوەیە دابەشکرا بوون:

زانستی: 11 هەزار و 735 قوتابی

وێژەیی: حەوت هەزار و 77 قوتابی

پیشەیی: 403 قوتابی

ئەوەی پێویستە بیزانیت: بریکاری وەزارەتی پەروەردەی حکومەتی هەرێمی کوردستان ئەوەش دەڵێت: لە خولی دووەم ژمارەی هۆڵەکان 450 تا 500 هۆڵ کەمتر دەبنەوە. لەبارەی ئەوەی قوتابی لە هەمان هۆڵی پێشووتری تاقیکردنەوە بکات، هێشتا لەو بارەیەوە دڵنیایی و بڕیار نییە.

خشتەی تاقیکردنەوەکانی بەشەکانی زانستی و وێژەیی و پیشەیی