فایلی خەڵک؛ دانیشتوانی پڕۆژەیەکی نیشتەجێبوون داوای ئاوی پڕۆژەی فریاگوزاریی دەکەن

ئاڤا نیوز

دانیشتوانی گەڕەکی لاوانی شاری هەولێر داوا دەکەن پڕۆژەی ئاوی فریاگوزاریی خێرایی هەولێر بگەیەنرێت بە شوێنی نیشتەجێبوونی ئەوانیش، بۆ ئەو مەبەستە داوایان لە ئاڤا کردووە دەنگیان بگەیەنێت. 

چیرۆکی سەرەکی: دانیشتوانی پڕۆژەی نیشتەجێبوونی لاوان داوایان لە ئاڤا کردووە بەدواداچوونیان بۆ بکات، لەبارەی هۆکاری نەگەیشتنی ئاوی فریاگوزاریی خێرا، چونکە شوێنی نیشتەجێبوونی ئەوانیش دەکەوێت سەر شەقامی 120 هەولێر و نزیکن لەو گەڕەکانەی ئاویان پێگەیشتووە. 

زانیاریی زیاتر: ئاڤا بەدواداچوونی کردووە و دەرکەوتووە بەشێکی زۆر لە پڕۆژە نیشتەجێبوونەکان هەمان گرفتیان هەیە و پڕۆژەی فریاگوزایی خێرایی ئاوی هەولێریان پێنەگەیشتووە. 

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤای ڕاگەیاند، هەموو ئەو پرۆژانەی کە دەکەونە سەر هێڵی یەکەم واتا دەرەوەی شەقامی 120 مەتری، ئەگەر پرۆژەی وەبەرهێنانن یاخود سەر بە شارەوانین نووسراومان لە ڕێگەی دەستەی وەبەرهینان و شارەوانی بۆ بکەن و ئێمەش ڕێککارەکان دەستپێدەکەین و ئاویان بۆ ڕادەکێشین، ئێستا بەشێکی پڕۆژەکان نووسراویان کردووە و سەرقاڵی رێککارەکانین.

زانیاریی تایبەت: بەپێی زانیارییەكانی ئاڤا، گرفتی سەرەکی بەستنی پێوەرە، ماڵەكانی ئەو پڕۆژانە پێوەری ئاویان نەبەستووە و مەرجەكەش ئەوەیە كە دەبێت بیبەستن دواتر ئاوی پڕۆژەكەیان پێدەگات.