کۆشکی سپی: ترەمپ شۆک بوو بە هێرشەکانی ئیسرائیل بۆ سەر سووریا

ئاڤا نیوز

کۆشکی سپی ڕایگەیاند، دۆناڵد ترەمپی سەرۆکی ئەمریکا سەری سوڕماوە لە هێرشە ئاسمانییەکانی ئیسرائیل بۆ سەر سووریا لە هەفتەی ڕابردوودا.

چیرۆکی سەرەکی: بەهۆی گرژی و ئاڵۆزییەکانی ئەم دواییەی نێوان چەکدارانی دروز و هێزە ئەمنییەکانی سووریا لە سوەیدا، ئیسرائیل بۆ پشتگیرکردن لە دروزەکان چەند هێرشێکی ئاسمانی کردە سەر ناوچەکانی سووریا و ئەمەش نیگەرانی ئەمریکای بەدوای خۆیدا هێنا.

لێدوانی فەرمی: کارۆلین لیڤیت، وتەبێژی کۆشکی سپی لە کۆنگرەیەکی ڕۆژنامەوانیدا ڕایگەیاند: ترەمپ شۆک بوو بە بیستنی هێرشە ئاسمانییەکانی ئیسرائیل بۆ سەر سووریا و بەخێرایی پەیوەندی بە سەرۆکوەزیرانی ئیسرائیلەوە کرد بۆ گفتوگۆکردن لەسەر ئەم پێشهاتانە".

هاوکات گوتیشی، ئێمە ئاگاداری دۆخی سووریاین و ئێستا دۆخەکە تارادەیەک ئارام بووەتەوە دۆناڵد ترمپ بە بەردەوامی پەیوەندی لەگەڵ نەتانیاهۆ هەیە.
 
لەلایەکی دیکەوە: دوێنێ ئەکسیۆس لە زاری چەند بەرپرسێکی کۆشکی سپی بڵاویکردەوە، ترەمپ لە سیاستەکانی ئێستای نەتانیاهۆ نیگەرانە بەتایبەت بەهۆی هێرشەکانی بۆ سەر سووریا و بە پیاوێکی شێت ناوی بردووە کە هەموو شوێنێک بۆردومان دەکات.