ئەمریکا نێوەندگیریی ئیسرائیل و سووریا دەکات

ئاڤا نیوز

ماڵپەڕی ئاکسیۆس ئاشکرای دەکات، ئەمریکا بەنیازە سبەی پێنجشەممە نێوەندگیریی کۆبوونەوەیەک لە نێوان بەرپرسانی ئیسرائیل و سووریادا بکات.

چیرۆکی سەرەکی: هەفتەی ڕابردوو شەڕ و ئاڵۆزی لە سوەیدا لەنێوان چەکدارانی درووزی و هێزە ئەمنییەکانی سووریا ڕوویدا و ماوەی هەفتەیەکی خایاند، دواجار ئاگربەست ڕاگەیێنرا و لایەنەکان گەیشتنە ڕێککەوتن.

زانیاریی بەدەستهاتوو: ماڵپەڕی ئاکسیۆس بەپشتبەستن بە چەند سەرچاوەیەک کە نەیانویستووە ناویان ئاشکرا بکرێت، ڕایگەیاند: "تۆم باراک، نوێنەری ئەمریکا بۆ کاروباری سووریا، ڕۆژی پێنجشەممە سەرکردایەتیی کۆبوونەوەیەک لەگەڵ بەرپرسانی باڵای ئیسرائیل و سووریادا دەکات".

زانیاریی زیاتر: بەگوێرەی ئاژانسی ڕۆیتەرز، "شوێنی کۆبوونەوەکە تا ئێستا ڕوون نییە." ئاکسیۆس ئاماژەی بەوەش داوە، پێشبینی دەکرێت تیشک بخرێتە سەر ڕێکخستنە ئەمنییەکان لە باشووری سووریا و زیادکردنی هەماهەنگی و پەیوەندییەکانی نێوان هەردوولا".

ئەمەش بزانە: بەگوێرەی زانیارییەکانی ئاکسیۆس، ئەم دیدارە یەکەم کۆبوونەوەی نێوان هەردوولا دەبێت لە دوای سەرهەڵدانی ئاڵۆزییەکانی هەفتەی ڕابردوو لە شاری سوەیدای باشووری سووریا و دواتریش هێرشە ئاسمانییەکانی ئیسرائیل بۆ سەر دیمەشقی پایتەخت.

 

باکگراوند: بەگوێرەی ئامارەکان، لە ماوەی حەوت ڕۆژی ڕابردوودا، ژمارەی کوژراوان گەیشتە 940 کەس کە زۆرینەیان هاووڵاتیی سڤیلن. ئەم ئامارە کوژراوانی پێکدادانەکان، لەسێدارەدانە مەیدانییەکان و بۆردوومانەکانی ئیسرائیلیش لەخۆدەگرێت.