لە جەنگی نێوان ئێران و ئیسرائیل کوژرانی کۆڵبەرەکان زیادی کردووە

ئاڤا نیوز

کۆڵبەرێک لە ناوچە سنوورییەکانی شاری بانە بە تەقەی هێزە سەربازییەکانی ئێران کوژرا. لە دوای جەنگی نێوان ئێران و ئیسرائیل کوژرانی کۆڵبەرەکان زیاتر بووە و لە یەک هەفتەدا پێنج کۆڵبەر کوژراون.

چیرۆکی سەرەکی: بەرزان ساڵحی 38 ساڵ کە خەڵکی شاری بانەیە و لە ناوچە سنوورییەکانی هەنگەژاڵی بانە ئەمڕۆ شەممە لەلایەن هێزە سەربازییەکانی ئێران تەقەی لێکراوە و گیانی لەدەستداوە. ئەو خێزاندارە و سێ منداڵی هەیە.

لێدوانی فەرمی: لاوێن ئەمانی، ئەندامی دەستەی بەڕێوەبەریی کۆڵبەرنیوز، بە ئاڤامیدیای گوت: لە دوای جەنگی ئێران و ئیسرائیلەوە ژمارەی کوژرانی کۆڵبەرەکان و گوشار لەسەر کۆڵبەرەکان زیادی کردووە.

- هەندێ لە بەرپرسانی کۆماری ئیسلامی ئێران کۆڵبەرەکان تۆمەتبار دەکەن کە چەک و چۆڵ دەبەنە نێو ئێرانەوە.

لەلایەکی دیکەوە: کامەران غەزەنفەری، پەرلەمانتاری کورد لە ئێران ڕۆژی 18-7-2025 وتی، کۆڵبەرەکان کەلوپەلی سەربازی و درۆن هاوردە دەکەن.

ئەوەی پێویستە بیزانیت: بەپێی ڕاپۆرتی کۆڵبەرنیوز کە گرنگیی بە پرسی کۆڵبەران دەدات، لە دەسپێکی ساڵی 2025ەوە تاوەکو ئێستا 39 کۆڵبەر بە هۆکاری جیاواز لە سنوورەکانی پارێزگاکانی کرماشان، سنە و ورمێدا بەهۆکاری جیاواز گیانیان لەدەستداوە.